Antslast peri tsihikimmäs ja teküs nuur Värtoni Liisa Loreena tekk’ koolin luuvtüüs monoetendüse «Kui ma oleksin president». Näütemäng sai kõva huu sisse, täämbädses om tütrik tuud ette kandnu mitmõn paigan üle Võromaa ja ossa võtnu ka üleeestilidsest festivalist «Kooliteater 2022». Tükk om rahvalõ miildünü ja saanu parasjago tunnustust.
Põhikooli 8. klassin piät egäüts tegemä määndsegi luuvtüü. Tuu või olla kas uurmistüü vai midägi praktilist. Aastit näütlemisega tegelnü Värtoni Liisa Loreenalõ es olõ teema valiminõ rassõ. Tälle tull’ õkva mõtõ kirota ja lava pääle tuvva monoetendüs. «Et ma olõ tõist aastat Antsla gümnaasiumi opilasesindüse president ja Antsla valla nuurivolikogo liigõ, tundu presidendi teemal näütemängu kirotaminõ õigõ samm. Viil aviti mõttõlõ üten sügüse peetü presidendivalimisõ,» seletäs Liisa Loreena.
Monoetendüs kõnõlõs nuuri murrist tulõviku peräst ja sääl märgotadas, kelles tulõvikun saia. Etendüs näütäs, kuimuudu väikun tiidvä kõik, kelles nä saia tahtva, a noorõ inemise jaos ei olõ asi inämb nii kimmäs. Etendüsen mäng Liisa Loreena mõttõga, mis olõs, ku tä esi olõs president. Tä märgotas, ku pall’o tä tennü sammamuudu nigu varatsõmba presidendi, ku pall’o tõistmuudu.
Etendüse jaos tull’ Liisa Loreenal kirota stsenaarium, etendüs lava pääle säädi ja perän tuuga uma kooli opilaisi iin üles astu. «Stsenaariumi kirotaminõ, esieränis viil säändsel teemal, võtt’ peris kõvastõ aigu. Oll’ vaia läbi lukõ hulga matõrjaalõ ja pruuvi, kuis erinevä mõttõ tüüle nakkasõ. Stsenaarium es sündü lihtsäle. Tull’ löüdä õigõt aigu ja uuta, et vaim pääle tulnu,» ütles Liisa Loreena.
Lavastus tull’ katõn esimuudu variantsin. Üts oll’ tuu, midä tä esi tekk’ ja minka astõ üles uman koolin. Tõnõ variants sündü kuuntüün näütlejä ja lavastaja Mellovi Zojaga, kiä pidä parhilla luuvterapeudi ammõtit. Liisa Loreena tahtsõ tetä etendüst parõmbas ja täl tull’ mõtõ Zoja käest api küssü. «Minevä aasta võti ma ossa Zoja lavastõdust Pokumaa suvõtüküst. Säält saiõ väega hää tundmisõ ja kogõmusõ, tuuperäst es olõ rassõ tedä tülütä,» kõnõlõs tä.
Monoetendüs miildü rahvalõ. «Egäl puul olli kaeja tõistmuudu, a kokkovõtvalt egäl puul kõigilõ miildü. Olõ saanu uskmalda pall’o kitmist ja tukõ.» Tuust julgust saiõn otsust’ Liisa Loreena ossa võtta ka Võromaa latsi ja nuuri tiatrifestivalist. Sääl sai timä monoetendüs edimädse kotusõ ja võimalusõ minnä üleriigilidsele tiatrifestivalilõ «Kooliteater 2022», miä oll’ Rakvere tiatrin. Kodo tull’ tä säält eripreemiäga mõtlõmapandva ja hää ütlemisega teksti iist.
Viil naati päält Võromaa latsi ja nuuri tiatrifestivali võitu Liisa Loreenat egäle poolõ üle Võromaa esinemä kutsma. Täämbädses om tä üles astnu Antsla kultuuri- ja spordikeskusõn, Vahtsõ-Antsla ja Lasva rahvamajan, Keeni, Osola ja Kuldrõ põhikoolin ja Võro liinan Euruupa pääväl.
Päält näütlemise ja virga ütenlüümise nii uma kooli opilasesindüsen ku ka Antsla valla nuurivolikogon lõpõt’ Liisa Loreena seo aasta muusikakooli, kon tä opsõ säidse aastat viiolit. Ka viiolimängu sai etendüsen kuulda. Viil miildüs tälle lukõ ja vabal aol uma perre ja sõpruga sporti tetä. Kõigi naidõ tegemiisi man om tä ka väega hää opilanõ. Egä kooliaasta om tä lõpõtanu kulladsõ kittüsekiräga, 2018. aastal oll’ tä Antsla gümnaasiumi kõgõ parõmb opja ja timahava sai edimädse kotussõ maakundligul imäkeeleolümpiaadil.
Tulõvikun taht Liisa Loreena kimmähe näütlejä olla. «Ma ei kujuta hinnäst ette näütlemiseldä, tuu om mu hobi, kirg ja kutsumus – tükükene must,» löüd tä.
Aasta peräst, pääle põhikooli lõppu, taht tä minnä edesi gümnaasiummi. Päält tuud kaes, mis elo tuu. Lavakunstikuuli minegi plaani täl parhilla külh ei olõ, a vabakutsõlidsõ näütlejänä taht ta kimmähe üles astu ka tulõvikun.
Rahmani Elo
Värtoni Liisa Loreena hoit üsän Võromaa nuuri näütemängupääväl võidõtut kratti ja avvokirja. Pilt eräkogost
