Seo nädälilõpp, 15.–16. hainakuul peetäs rahvamuusikatüütlüisi festivali Mooste Elohelü. Katõ päävä sisse mahus kontsõrtõ, tüütarri, tsõõrikäüke, esitlüisi ja pall’o muud. Festivali lõpõtas võigõluskontsõrt, kon timahava kandas ette tüütlüisi Räpinä kihlkunnast kirja pantust laulust «Küläkene väikokõnõ».
«Mi festivalilõ om seokõrd tulõman peris suuri kuunsaisõ. Näütüses tulõva riidi kokko koori, kiä kandva ette vahtsõt võrokeelist muusikat. Perimüsest mõotõdu kavaga ast üles ka VHK kiilpilliorkestri üten Jürjensi Mariga. Puhkpillimuusikat nõst püüne pääle show-orkestri The Tomahawck Brothers – tõtõstõ põnnõv, kuis nimä timahavast võigõlusluku tõlgõndasõ,» seletäs Mooste Elohelü projektijuht Tammõ Liivi.
Elohelü aigu tegevä uma ussõ vallalõ Mooste mõisan toimõndava käsitüükua. Nä näütäse umma kraami ja tuud, midä tetä mõistva. «Olõmi tan naarnu, et Mooste om õkva nigu otsalda imeasjo paik, kon egä aastak tege ussõ vallalõ mõni vahtsõnõ kontsõrdisaal. Katõ aasta iist teimi valla Eestimaaehitüse saali, minevä aastak lei edimäst kõrda ussõ vallalõ Mooste aida kontsõrdipaik ja timahava võtt festivali vasta Vanaajamaja miiskund. Sääl saalin tulõva suurõmba võimõndusõga pääväkontsõrdi,» and Tammõ Liivi teedä.
Projektijuhi sõnno perrä omma pall’o ansambli aastit löüdnü tagasitii Moostehe. Saman kasusõ ka vahtsõ bändi pääle. Nii mõnigi nuurilava pääl alostanu ansambli om võigõluskontsõrdil üles astnu nii uhkõ tüütlüsega, et om saanu preemjit. «Tüü nuuri muusikidõga pand silmä helkämä nii kõrraldajal ku tüütarri läbiviijäl. Tüütarrin sünnüs vahtsõt energiät ja nii saa julgõlõ järgmädsele aastalõ vasta minnä,» kõnõlõs Tammõ Liivi.
A midä tähendäs Mooste Elohelü paigapäälidse kultuuri jaos? «Ma arva, et ka seo om üts festivali missioon, et iks kõigil olnu meelen, ku põnnõv om seo kandi kultuur ja midä kõkkõ mi perimüse põh’a pääle luvva saa. Saami olla uhkõ võro keele ja uma kultuuriperändi pääle. Seo rikkus avitas meil alalõ püssü. Mooste Elohelü om üts paik, kon saami hinnäst näüdädä ka kavvõmbilõ küläliidsile,» löüd Tammõ Liivi.
Näüdätäs vahtsõt võrokeelitside koorilaulõ koko
Mooste Elohelü kiriväst kavast löüd timahava ka vahtsidõ võrokeelitside koorilaulõ kogomigu «Liigu’, liigu’, laulukõnõ!» vällänäütämise. Tego om noodivihuga, kon om 33 laulu, mink siäst löüdvä hindäle lauluvarra nii miihi-, naisi- ku ka segäkoori. Seo om joba tõnõ võrokiilside koorilaulõ noodikogomik ja kokko säetü laulõst, miä saadõti minevä aasta peetüle neländäle võrokiilside koorilaulõ ja -säädide konkursilõ.
Vällänäütämine üten kontsõrdiga tulõ 15. hainakuul kell 17.30. Pääle vahtsõ noodivihu laulõ kuuld sääl tõisi vahtsõmbit võrokiilsit koorilaulõ. Üles astva naisikuur Tempera ja segäkuur Hilaro Võrolt ja ansambli Miinus Seitse Tal’nast.
Täpsembä ülekaehusõ tuust, midä timahavadsõl Mooste Elohelül nätä, kuulda ja tetä saa, löüd festivali kodolehe moostefolk.ee päält.
Rahmani Jan
Ansambli Trad.Kvintessents, kiä astõ üles mineväaastagadsõl võigõluskontsõrdil, om ka timahava tulõman Moostele kontsõrti andma ja võistlõma. Maseni Kristina pilt
