Panõmi kõik purki
Ma kuuli raadiost, et mõtsah pidi kikkasiini olõma külh. Esi olõ-i nii kuumaga viitsnü mõtsa minnä. Ja maas’ka omma suurõmba ja makõmba ku minevaasta. Ja rahha es küstä marju iist suurt rohkõmp. Ja hernekõdra omma jo paksus paisunu. Ja kurkõ saa õkva pindrest võtta ja haugata. No saa värskit kraami kõttu, külmäkappi ja purkõ sisse.
Ma kuuli raadiost tuud kah, et piimäkuuh kulutõdi niisama pall’o vuulu ku minevä jõulukuu. Sõs kullu tuu lämmistämises, parhilla jahutamisõs. Ku egäsugumaidsi uskmalda asju om vällä mõtõldu, sõs olõssi aig naada tagavaras korjama suvõlämmind ja talvõkülmä. Näet, suusalummõ hoiõtas külh üle suvõ järgmädse talvõni. Sammamuudu piässi purki korjama kuuma külmäpühhi jaos ja külmä, et suvõilma vähä maaha jahuta. Ma panni mitu termost jaanipäävä kuuma õhku täüs. Jõulu aigu ti mäletäti, a mul om.
