Üts vana legend kõnõlõs, et kunagi olnu kiili ilodusvõistlus. Tuu ollõv är võitnu itaalia kiil, tõsõ kotussõ saanu eesti kiil lausõga «Sõida tasa üle silla». Võrokõsõ kõnõlõsõ tuud legendi edesi nii, et ku olnu võistlusõn võrokiilne lausõ «Sõida hillä üle silla», sis mi olõs vast tuu ilodusvõistlusõ ärki võitnu.

A keelest ma ei taha täämbä kõnõlda, hoobis sõitmisõst. Olõ seo suvi tähele pandnu, et mul kulus autoga sõitõn veidemb kütüst ku varrampa. 45liitridse paagitävve diisliga saa uma 15 aastakka vana Opeliga sõita 200 versta inämb ku varatsõmbil suvvil. Mille nii?

Arvada tuuperäst, et olõ naanu «vanamehe muudu» sõitma. Maateie pääl, kon kedägi tõist ei liigu, saa rahumeeli sõita 70 kilomiitret tunnin. Trassi pääl tulõ tõisiga inämb rehkendä, sääl vinnümä jäiä ei saa, a ka sääl saa sõita nii, et spidomeetri näütäs 90. Varrampa jäi ma niimuudu sõitõn tõisilõ jalgu, a no om tõisigi musugutsit ja ütsiku marutaja piät miika rehkendämä. Arvada omma tõõsõki tähele pandnu, et niimuudu sõitõn kulus kütüst iks hulga veidemb.

Aastakümnit omma targa pää märknü, kuimuudu liiklust mi teie pääl rahuligumbas saia. A säädüse, trahvi ja kampaania ei olõ siiämaani sutnu är tetä tuud, midä tekk’ autukütüsse hind. Uma rahakott tüküs iks iholõ kõgõ ligembäl olõma.

Sõida hillä (üle silla), aigu om!

Rahmani Jan,
Uma Lehe päätoimõndaja