19. põimukuul peeti Võro liinan Katariina allee pääl kirändüsuulitsat. Varrampa ei olõ säänest üritüst tettü ja kuigi ilm oll’ tuu päiv väega lämmi, või uulitsa pääl nättüga rahulõ jäiä, selle et tegemiisi oll’ egän vannusõn inemiisile.
Panõ siiä kirjä, miä kirändüsuulitsalt kõgõ inämb miilde jäi.
1. Pall’o raamatit. Uulidsa päält saiva huvilidsõ hindäle kodo viiä pall’o massulda raamatit. Noid oll’ vällä pantu Vana-Võromaa muusõumi ja Kreutzwaldi kujo man. Raamatidõ valik oll’ suur ja noidõ hulgan oll’ klassikidõ teossit ja mitte nii tunnõtuid teossit kah.
2. Kiränigu. Uulidsa pääl sai nätä egäsugumaidsi kiränikke. Osta sai Võromaa kiränige raamatit, näütüses olli ummi raamatidõga välän Contra, a ka nuur kiränik Kronbergi Silvia. Raamatit olli vällä pandnu viil Raitari Inga ja Kronbergi Janika. Muidoki oll’ telk võrokeelitside raamatidõga Võro instituudi puult.
3. Hulk ülesastjit. Sai kullõlda, kuis Võromaa noorõ luulõt lugõva ja ettekandit võrokeelitsest «Kalõvipujast». Umast loomingust kõnõliva Võromaa kiränigu ja kullõlda sai Ruusmaa Vootele helüteossit, miä olli tettü Võromaaga köüdetüisi autoridõ luulõtuisist. Vahepääl sai kuulda lõõdsa- ja kandlõmängu.
4. Raamadulainaminõ. Vällä oll’ tulnu Võromaa keskraamadukogo, kiä paksõ umalt puult kohvi ja präänikit ni andsõ võimaluisi välläpantuid raamatit lainada.
5. Matk Võro liina pääl. Pääle esinemiisi oll’ matk, mida juhtsõ Contra. Sai tetä väiku tsõõri Võro liinan, kullõlda Contra mälehtüisi ja juttõ Võro liinast. Contra lugi ette vannu aoleheartiklit ja tekk’ niisama nall’a.
Üts jutt oll’ Contral sääne, et Vabahusõ puiõstii Tal’nan lõpõs Laagrin.
Rahmani Elo
Häniläne lugõ kiränigõ telgi all ummi luulõtuisi. Rahmani Elo pilt
