Lämmi aig
Ma kuuli raadiost, et Euruupah om seol suvõl olnu innenägemädä kuumalainõ. Mitmõsaa aasta vannudsõ kuumarekordi omma sadanu, mõtsa palasõ, maa om kuionu. Riikeh om vällä hõigat hädäolokõrd.
A meil oll’ kuum suvi kolmkümmend aastat tagasi. Muidoki sündü sõs siiämaani püsünü kuumarekord, ku Võrol oll’ 35,6 kraati lämmind. A pall’o kuumõmb oll’ sõs tuuperäst, et mõnõ kuu joosul tull’ tagasi Eesti kruun, kiteti hääs põhisäädüs, üle pikä ao valiti president ja riigikogo. Nii pall’o tähtsit ja suuri asjo tetti är, et mõnõ väikumba as’a jäivä katõ silmä vaihõlõ. Näütüses pronksi valõt soldan vai mõni verevä viisnukaga tank. Parhilla om jälki kuumas lännü, nii ilm ku elo. Ku ilm käänd sügüse tullõh jahhembas, sõs inemiisi maahajahtuminõ võtt viil aigu.
