Seol priinimel om Eestin 30 kandjat. Nimi panti Vana-Antsla mõisan, saaja ellivä Kiisa, Laksi, Härmä ja Suurõsõõru-Hinni talun. Varahampa, 1811, olli elukotussõ Härmä ja Suurõsõõru-Hinni, viil varatsõmbist hingelugõmisist tulõ vällä, et tegemist oll’ Hinni Jüri ja Hinni Mihkli poigõga. Sama suguvõsa liikmõs oll’ ka üts sant Mihkli, Reinu poig, a timä sai Pantaloni priinime pääle surma, selle et kuuli 1818.

Pantaloni nime algkodu Suurõsõõru-Hinni om seo poolõst märkmist väärt, et sama priinimi püssü sääl talun vähämbält 20. aastasaa lõpuni.

Nime alussõs võissi olla pühämehenimi, miä Õdagu-Õuruupa ja ka saksa traditsioonin om Pantaleon. Eestin tundas kreeka nimekujust saadut nimme Panteleimon, minkalõ vastas ka vinne keele Пантелеимон. Kreekakeeline nimi tähendäs ’kõiki vasta halastaja; armulinõ’, a ülekantun tähendüsen ka ’kõiki arstja’. Nime tuntus tegijä Pühä Panteleimon elli 3. aastasaal Nikomedian (parhilla Türgü) ja oll’ kuulsa tohtri, kedä peeti immetegijäs. Võhlust täüs kolleegi kaibsiva timä pääle Rooma keisrile, et tä om kristlanõ. Umast usust vallalõ tä es ütle, ka piinamise pääle. Esiki timä hukkaminõ es lää kõrda inne, ku Panteleimon oll’ esi pallõlnu hukkajidõ iist ja hinnäst näide meelevalda andnu.

Tõnõ, vähämb usutav võimalus om, et Vanan-Antslan anti priinimes Itaalia commedia dell’arte tegeläse Pantaloone nimi. 16. aastasaa tegeläskuju tüübis om Veneetsiä vanamiis, tsussõrdaja, kidsi, a sõski moodunarr (kitsa kaadsa, midä naati kutsma «pantalooni»). Ka timä nime alussõs om kõgõ usutavambalt Panteleimoni pühämehenimi.

Saarõ Evar

Rubriigin kõnõldas perekunnanimmi periolõmisõst ja tähendüsest.