19. põimukuul tetäs Võro liinan vallalõ kirändüsuulits, miä lätt Katariina kujo mant Kreutzwaldi avvosamba mano. Kreutzwald om üts Võro ku kirändüsliina hundamendi ehitäjä ja Katariina II üts kiränikõlõ pall’o lätteainõt andnu inemine. Näide katõ vaihõl saa huvilinõ uulidsa pääl kaia, kullõlda, lukõ, tetä pall’o köüdüssen raamatidõ ja kirändüsega.
Kirändüsuulidsa mõtõ tull’ Kreutzwaldi majamuusõumi pernaasõl Hollo Aimil päält tuud, ku tä oll’ jalotanu Tal’na ja Pärno kirändüsuulitsal. «Mille ei võinu Võrol kah olla kirändüsuulits, ku tan om elänü eesti kirändüse üts läte – Kreutzwald,» ütel’ tä. «Innekõgõ om suuv juhata inemise seo ettevõtmisõga raamadu mano, et raamat tõtõst jõvvasi kõigi kätte, kiä timä vasta huvvi tundva.»
Festival om valla kõigilõ, kiä tahtva tulla kirändüsest ja raamatist kõnõlama ja näid tutvas tegemä. Ettevõtmisõn lüü üten näütüses Võromaa keskraamadukogo. Kreutzwaldi pargin saa raamatit lainuta ja lukõ ja tuu mano hällüpääväkohvi rüübädä. Seol raamadukogodõ teema-aasta põimukuul saa Võromaa keskraamadukogo 113aastadsõs.
Pääle kokkosaamiisi raamatidõga pakk festival võimaluisi trehvädä kiränikega, säähulgan võro kiränikega. Videotervitüse tege Kauksi Ülle, kohal omma Häniläne, Rahmani Jan, Laanõ Triinu, Kelbä Heiki, Kronbergi Janika ja Contra. Viimäne võtt huvilidsõ üten ja tege näidega ka üte liinatsõõri «Uma liin, uma kiil». Uma aig andas kirändüsuulitsal püüne pääl viil noorilõ luulõlugõjilõ, kinkal umma loomingut kaasi vaihõl viil ei olõ.
Eräle om mõtõldu latsi pääle. Näile pakutas alatõn kelläst 11 mitmõsugumaidsi tegemiisi telgin Vana-Võromaa kultuurikua kõrval. Latsilõ ja nuurilõ pakk arvada huvvi ka fotoboks Lauluesä samba man, kon saa hindäle lavaasjuga vahtsõt vurhvi anda ja sis pilti tetä.
Päiv ei lää jumalihe ilma muusikalda. Kellä 15 aigu and Meelise & Katrini duo kirändüsesõbrulõ kontsõrdi «Pargiviisi». A päävä seen luvvas võimaluisi kullõlda Ruusmaa Vootele helindüisi, mille luumisõs om andnu tälle mõttit Vana-Võromaa luulõtajidõ looming.
Kabuna Kaile
Noorõ kirändüssõbra Raju Eliisabet ja Parhomenko Maara kutsva kirändüsuulitsalõ ummi luuleettekandit kullõma ja näütäse Katariina kujo man tulõjilõ joba tiiotsa kätte. Kabuna Kaile pilt
