Aoluu ilo
Ma kuuli raadiost, et ildaaigu koolnu Inglüse kuninganna oll’ riigipää säidsekümmend aastat. Timä aigu jõudsõ ammõtih olla viistõist pääministrit. Inglüsmaa sai tuu aoga tõsõ ilmasõa viletsüsest jõukas riigis. Säänest valitsõmisrekordit olõ-i niipia võimalik üle lüvvä, ku ülepää. Seo aoluuraamadu lehekülg om valmis saanu.
Meil peetäs täämbä vastapandmisvõitlõmisõ päivä. Tuuga märgitäs Tiefi Otto valitsust, mis pidi vasta õnnõ mõnõ päävä, ku sakslasõ lätsi ja vinläse tulli. Tuu veitü aoga panti kimmäs alos Eesti riigi püsümäjäämisele pikäst okupatsiooniaost huulmalda. A tuust väega kõnõlda-i, et Tiefi Otto elli kah pikä elo. Õnnõ pääle vangilaagrit es saa tä Eestihte tulla, elli Ukrainah ja Lätih. Inne surma jõudsõ tä siski kodomaalõ tagasi ja kuuli Ahja haigõmajah. Timä jälg aoluuraamatuh om kah kimmäs.
Kuiki mi olõssi täämbä nigu terve Euruupaga säidsekümmend aastat tagasi sadanu sinnä tõõsõ ilmasõa järgsehe aigu, ku kõgõ tähtsämbä olli lämmi tarõ ja täüs kõtt. Sõski ei tohe unõhta, et vabahus om iks üle kõgõ.
