Mõni aig tagasi oll’ mul elon väikene tähtpäiv ja ma mõtli, kuis umilõ hüvvile sõprulõ ja umatsilõ kõrralda üts sääne sündmüs, miä pikembäs aos miilde jääs. Et ma olli mõnõ aasta iist kokko saanu luudusõmehe Relve Hendrikuga, saadi tälle sõnumi ja küsse, kas tä saanu tulla miika üten matkama ja luudusõst kõnõlõma.
Alostimi 30–40 inemisega Hinni kanjonist. Tahtsõmi läbi kävvü Rõugõ ürgoro tii kooni Ööbikuorgo vällä. A ku Hendrik tull’ ja Hinni kanjoni man uma noki vallalõ tekk’, saimi arvo, et aost tulõ puudus. Hendrik kõnõl’, kuis tuu kõik sinnä um sündünü, kuis sääl, kon um säidse ilosat ürgoro järve, oll’ timä tiidmise perrä hulga ao iist jõgi ja ku ijäaig tull’, sis ijä tougas’ tuu maa nii kokko, et jõgi kattõ är, a järve jäivä ja õnnõ väiku oja juuskva noist läbi.
Võtt’ peris suu vallalõ, ku üts miis sais ütskõik määndse kasvu man, näge ütskõik määnest mutukat, pidä puu man kinni ja kõgõst, miä ette jääs, um täl kõnõlda uma lugu. Ja suu jääs ammulõ ka tuust, ku rikas um luudus. Hendriku juttu kullõldõn sai teedä, et pia kõkkõ, miä luudusõn kasus, um võimalik põskõ pistä. Esiki vereväst kärbläseseenest pidi saama hää praat, ku valgõ täpi kübärä päält maaha võtat. (A tuud ma kellelgi perrä pruuvi ei soovita.)
Lisas luudusõ tundmisõlõ mõistsõ Hendrik esieräliidsi köüdüssit löüdä. Ku tä kõnõl’ haavapuiõst, pallõl’ tä kullõlda, kuis haavalehe laulva, ja kõik saiva arvo, et tuu um väega tõsinõ muusiga. Ja värski õhk olõ-i timä jaos lihtsä asi, a um hüvvi lõhnu kompott. Nuu hää lõhna andva tervüst ja hääd tujjo ja mutuka tundva hää lõhna perrä är, määne um õigõ häierm, kost suguseldsile süvvä kor’ada.
Ku saat kõndi säänest tiid, kasta hinnäst vahepääl järve ja jõuda vällä Ööbiguorgo Pesäpuu torni otsa, sis võit kül julgõlõ laulda: «Imeillos olõt sa, Eestimaa!» Ja olla väega tenolik luujalõ, et tä um lasknu meid siiä nukka sündüdä ja kõgõst taast ilost häädmiilt tunda. Rändämine kuun ummi parõmbidõ sõpru ja luudusõmehega um üts suurõmbit kingitüisi, miä elon olla saa.
Pindmaa Aigar
Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.
