Simunapääväl, 28. rehekuul peetäs Lindora laata. Timahava saadõtas nuu müüjä, kiä hinnäst varrampa tii viirde valmis omma säädnü, järekõrra lõppu. Nigu joba aastit kombõs, saa Võromaa ja Setomaa piiri pääl peetävä laada aos valmis ka tulõva aasta Võro-Seto tähtraamat.

Lindora laat om mikandi üts tunnõtumpi laatõ. Kauplõjidõ jaos om taa huuao lõpulaat ja tuuperäst om müüjil suur himo sinnä minnä. Ku varrampa omma mõnõ müüjä säädnü hinnäst Lindora tii viirde valmis joba nätäl inne laata, sis timahava lupassõ kõrraldaja, et neo, kiä omma tii veeren inne 26. rehekuu päivä, saava uma kauplõmiskotussõ kõgõ perämädsenä.

Kauplõmiskotussit ette kinni panda ei saa, nuu jaetas vällä elävä järekõrra perrä 27. rehekuul kellä 16–22 ja 28. rehekuul kellä 6–8.

Lindora laada aos tulõ trüküst ka tulõva aasta Võro-Seto tähtraamat. Tuu om kallendri-almanahh, midä andas vällä joba 34. aastat.

Tulõva aasta tähtraamatust saa lukõ Tsooru kandi ja Saurova nulga vana ao juttõ, artiklit Mõnistõ muusõumi luujast Lepä Alfredist, Räpo külä luku, Tootseni Toivo märgotust umast sünnüpaigast Rõugõst, sõast ja võrdsist õiguisist. Intervjuu omma tettü kolmõ inemisega, kiä pei 2022. aastagal võro keele iistkõnõlõja ammõtit. Lukõ saa ka märgotust Kauksi Ülle näütemängu «Nigu nõidus» kotsilõ. Nigu iks, om tähtraamatun ka luulõtuisi. Seokõrd saava lisas ütele ukraina luulõtajalõ sõnna Contra ja Korneli Viiu. Rubriigin «Simunapääväst simunapääväni» omma är tuudu aasta joosul Võro ja Seto kultuuriruumin olnu sündmüse ja välläandõ. Nigu õks, om ka kallendrijago ja lõpun om väiku mõistatus.

Tulõva aasta tähtraamadu om kokko säädnü Vaaba Janek, pildi om joonistanu Reimanni Hildegard.

Rahmani Jan