20. rehekuu pääväl pidi Lüllemäe kuul meelen suurt võro kirä-, usu- ja poliitigamiist Lattiku Jaani timä 144. sünnüaastapäävä puhul.

Joba 22. kõrda oll’ Karula kerkon aktus ja päält tuud sõidõti Lattiku sünnükotussõlõ Mäkistele, kost sai sõs tagasi Lüllemäele kas võiki juuskõ vai kõndi, kuis kinkalõgi 5,5 km pikkunõ rada jõvvu perrä oll’.

Ilm ja sügüsene luudus oll’ hõngumatvalt illos, tii veeren «kontrollpunkti» ehk joonistõdu pildi Lattiku tunnõdu jutu «Tiijuht» perrä, mink nimme ka mälehtüsjuusk ja -kõndminõ kand.

Koroona-kadsu peräst jäi kimmäs traditsioonis saanu ettevõtminõ kats aastakka är, a toda härksämp ja vunki täüs oll’ timahavvanõ Lattiku-päiv. Näütes lei üten Valga Priimõtsa kooli esindüs. Aktusõl kuuld’ üte opilasõ ja paari oppaja esitüsen ka Lattiku võrokiilset loomingut.

Om iks hää jäl miilde tulõta, et tunnõt laulupidolauluski saanu «Olõs mul üts väiku veli» om Lattiku luud, niisamatõ päämidselt matitsil laulõtav «Kalla, kallis Isa käsi!».

Illos päiv sündü Lüllemäe koolil kuuntüün Karula kerko ni Karula-Lüllemäe tervüse- ja spordikeskusõga

Allasõ Tiia

Juuskmisõ alostus Mäkistel. Allasõ Tiia pilt