Tulviste Hele
10.06.1952 – 4.10.2022
Tulviste Hele tüüt’ muusõumin 1. urbõkuust 1988 kooni 19. piimäkuuni 2021. Tulviste Helega olõ ma olnu ütel aol Võromaal muusõumitüül umbõs 13 aastakka. Hele oll’ Mõnistõ muusõumin tiidrü-juhataja, ma olli Võromaa muusõummõ tiidüsdirektri. Ollimi ammõdivele.
Hele ummamuudu tüükõrraldus ja metoodiga miildü mullõ. Hele nakas’ kõrraldama teemaperitsit päivi. Näid oll’ kümne ümbre. Miilde tulõva linapäävä, leeväpäävä, piimäpäävä, lamba- ja hobõsõpäävä. A kõik olõki-i inämb meelen.
Hele mõistsõ är pruuki umakandi vanõmba memme ja taadi, kinkal olli tiidmise. Kiä olli töid ja tegemiisi nännü, esi tennü. Hele kutsõ abis ka uma tõsõpoolõ Urmassõ, kiä umakõrda kutsõ üten mõnõ krapõ taadi, et üles säädi linamurdmisõ massin, midä aeti ümbre hobõsõga. Taad tüüd õnnõ näüdäti. Sääne linaluumurdmisõ vällänäüdüs oll’ niivõrd harv ja esieräline, et ka suurõmbidõ muusõummõ as’atundja olli tsipa kadõ. No ja midä linatüüst peräkõrd saias – muusõumi juhatajal Tulviste Helel oll’ sällän illos linatsõst rõivast kleit.
Hää om nätä, et Hele om mõistnu avvulidsõlt hoita ja hinnada muusõumi innembiidsi juhatajidõ tähtsät tüüd. Ma mõtlõ tan Lepä Alfredi kogomistüüd ja vabaõhumuusõumi huunit. Hele om korgõlt hinnanu ka Kengi Pauline tüüd muusõumi kogodõ tiidüslidsel kirjapandmisõl.
11. süküskuul 2021. aastagal tetti Tulviste Hele iistvõtmisõl vallalõ nimelidse mälehtüspingi Lepä Alfredile ja Kengi Paulinele. Hele es olõ inämb ammõtlidsõlt tüül, a toimõnd’ kangõhe. Ma näi seokõrd ka Hele suurt vahtsõndust päämajan, sinnä oll’ tettü vällänäüdüsses vana küläpuut. Kaimi ka vahtsõmbal aol Hele kogutuisi asjo. Näide hulgast om miilde jäänü pikkvankri. Mõtli, et taa olõssi väega põnnõv eksponaat, ku olnu õnnõ rahha taad kõrraligult inneskidses tetä.
Kah’os om Hele elotuli kistunu. Jäänü om illos mälehtüs hääst muusõumitüütäjäst ja hääst inemisest. Suur teno sullõ, Hele!
Tuulingu Enn, kiä esi oll’ kah lühküt aigu muusõumin tüül, om tennü luulõtusõ kündlest. Tuu künnel jaga õdagu, ku pümmes lätt, kõiki pääle valgust. Ja esi palas kõrrast lühembäs. Ku künnel ütskõrd periselt är kistus, om tä hindäga rahul, et sai pümmet üüd kõiki ümbre tsipakõsõ valgõmbas muuta. Mu jaos käü tuu luulõtus küländ häste Tulviste Hele kotsilõ.
Võtami üten tüüseldsiliidsi ja sõpruga ossa Hele umatsidõ leinäst.
Kengi Vaino
