Egä aasta märdikuu edimädsel täüspikäl nädälil peetäs võro keele nädälit. Seo aasta om võro keele nätäl 7.–13. märdikuul. Tuul nädälil pruugitas üle riigi meediän ja sotsiaalmeediän inämb võro kiilt, kuulõn ja latsiaidun kõrraldõdas võrokeelitsit ettevõtmiisi.

Joba kolmas aasta om herksämbil võrokõisil võimalus naada võro keele agendis. Agent om tuu, kiä aja ummi egäpäävätsit tüü-, kooli- vai muid asju võro keelen ja om tuuga tõisilõ iinkujos ja härgütüses. Ku tüü miildümä nakkas, või tuud ka pääle võro keele nädälit lõppõmalda jakada. Agent või umma agenditüüd kittä näütüses Mol’oraamatun, niisama panda sinnä mano pilte ja telefoniga tettüid filmijupikõisi.

Võro keele agent tuntas är, ku täl om sälän agendihamõ. Tuu või olla ka minevaastanõ vai üleminevaastanõ. Ku hamõt ei olõ, või agendil olla ka õnnõ rõnnamärk.

2022. aastaga võro keele agendi lõugahus (tunnuslausõ) om «Üts süä, kats kiilt». Om jo nii, et võrokõnõ saa umma ello üten kats imäkiilt. Väikukeisi latsiga kahjus väega sakõstõ ei kõnõlda võro keelen, a ku lats vähä suurõmbas saa, sõs aetas juttu ja praavitõdas maailma iks uman keelen. Agendihamõt saa telli kooni 17. rehekuu pääväni umapuut.ee lehe päält.

UL