Mõni aig tagasi oll’ hää võimalus kävvü Hiiumaal poetessi Alavainu Ave 80. sünnüaastapäivä tähistämän. Mu kalli kaasa Kreeda latsõpõlvõkodu um Kärdlän, nä olliva naabri ja kävevä tihtsäle umavahel läbi.
Joba üle mere minek ja päävä paistuminõ üle vii teküt’ ummamuudu tundõ, nigu lääsi kohegi vällämaalõ. Ja läbi Hiiumaa sõitõn oll’ pall’u süküsvärve ja sügüsest luudusõillu. Kõik tundu kuigi tõistmuudu ku Võrumaal.
Kärdlä keskliinan um üts armsa kohvik, midä pidä itaalia perekund. Näide man ehtsät tiramisut maitsõn ja lesta süvven sai arvu, et õdak tõotas tulla väega hää.
Et mu tõõsõlpoolõl oll’ ka väiku roll sääl pidustuisil, tä lugi Ave luulõtuisi ja mängse harfi, tull’ meil varõmb kohalõ minnä. Tarõn, kon esinemist ette valmistõdi, trehvsi kuun olõma Sibula Riho, Timmi Tõnu ja Agana Ainiga. Tuu tunnikõnõ, ku mi umavahel juttu aiõn ollimi, andsõ viil kõrd aimu, et õdak lätt kõrda.
Kärdlä kultuurimaja saal oll’ paksult rahvast täüs. Edimädsen rian istõn ja Ave pilti kaiõn sai arvu, et Eestimaal um elänü ja eläs hingelidselt väega rikkit inemiisi, kes läbi ummi kirätükke vai luulõtuisi andva inemiisile hingejõudu.
Mälehtüisist tull’ vällä, et pääle luulõtuisi kirotamisõ oll’ Avel seen pall’o elojõudu ja naasõlikku tarkust. Ja tä sutsõ Kärdlän ja Hiiumaal pall’u ellu kõrralda. Ave uma tulõkibõnaga pandsõ inemiisi hindä tahtmisõ perrä asju tegemä, tälle es julgu kiäki vasta üteldä, timäga vaiõlda.
Ku sis kontsõrdil Timmi Tõnu, Sibula Riho ja Agana Ain uma noki ja pillihelü valla teivä, sis nuu Ave tekste pääle tettü laulu olli nii ilusa, et meil kaasaga tull’ sääne mõtõ, et sändsit hengemuusika õdakit võis olla terve Eestimaa pääl pall’o rohkõmb. Sääl võissi palla kündle ja olla inemise, kes midägi mõistva, kas pilli mängi, luulõtuisi lukõ vai midägi viil tetä.
Sai sääl uma naha pääl tunda, kuis üten hengen või palla tuli ja kuis tuu um edesi kandunu tõisi luujidõ inemiisi sisse. Sääne tuli, miä avitas seol keerulidsõl aol hindäga toimõ tulla ja ellu edesi ellä.
Pindmaa Aigar
Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.
