Puulpäävä, 10. joulukuu pääväl peeti Võro Waldorfi kooli Väike Werrone Kuul ja Waldorfi latsiaia Terve Pere Aid edimäst joululaata. Tuu es olõ peris harilik joululaat, selle et õnnõloosi, kohvigukraami ja kallõndri müügiga kor’ati rahha latsiaialõ ja koolilõ maja hindäle ostmisõ fondi.
Seo aasta om Waldorfi latsiaia ja kooli jaos olnu tsõõrikidõ tähtpäivi aasta. Nimelt sai latsiaid kümme ja kuul viis aastat vanas. Taa aoga omma mõlõmba asotusõ jõudsahe kasunu: latsiaid om saanu mängu- ja sõimõrühmä Navilõ ni kuul kasunu põhikoolis. Edimäst kõrda kooli ja latsiaia aoluun oll’ kokko kogonu nii hulga joudu, et saadi kõrralda ütine joululaat.
Waldorfi asotuisi man om tähtsä oppajidõ ja vanõmbidõ teküs kuuntüü. Latsõ olli esi, üten klassikaaslaisi, vanõmbidõ ja oppajidõga tennü laada jaos egäsugumaidsi meisterdüisi, küdsänü kohvitarõ jaos piirakit, tennü õnnõloosi. Oppaja Guerrin’ Triinu juhendamisõl olli paprõkotikõisi sisse saanu ja müügis pantu esiki aiavilä- ja lillesiimne. Laada aigu sai opitarrin mängi ja meisterdä, kaia etendüst «Hõpõsõrg», kullõlda latsi laulmist, Soonõ Katrini kandlõmängu, latsi pillimängu ja Kuusigu Kirsika kontsõrti.
Laadalõ oll’ tulnu päält latsõvanõmbidõ ja vanavanõmbidõ ka peris võõrast liinarahvast. Paistu, et kõik jäivä väiku laadaga rahulõ, näütüses vähämbä koolilatsõ olli rahul, et näivä ummi sõpru latsiaiast. «Suur lämmi rõõmsa miil om, et om sääne kogokund olõman, ja mul om hää miil, et latsiaia ja kooli vanõmba saava tutvas,» kõnõl’ Terve Pere Aia direktri Soonõ Katrin.
Laada aos oll’ valmis saanu latsiaia ja kooli 2023. aasta sainakallõndri, miä om nigu väiku teedüsteos, kost saa lukõ latsõ arõnõmisõst, pedagoogikast ja Waldorfi asotuisi tüüst Võromaal, a kon seen omma ka latsi joonistusõ. Kallõndri ostmisõga saa tukõ latsiaida ja kuuli uma maja ostmisõl. Kallõndrit müvväs Võro Waldorfi koolin Kreutzwaldi 34 Võro liinan.
Kiä taht kah maja ostmisõ fondi rahha anda, saa tuud tetä SA Werrone konto pääle EE392200221066418062 vai MTÜ Terve Pere Selts konto pääle EE571010220210808228.
Fastrõ Mariko
Mückeri Liisi ja Ilvesse Liis Terve Pere Aiast laadal kallõndrit möömän. Kallõndrit saa edespiten osta Võrolt Werrone koolist. Fastrõ Mariko pilt
