Eesti Maaturismi MTÜ ja Maalehe iistvõtmisõl om 2023. aastak kuulutõt sanna-aastagas. Võromaa jaos om sanna-aastak tähtsä innekõkkõ tuuperäst, et Vana-Võromaa suidsusannakombõ omma UNESCO üleilma tähtsä kultuuripärandüse nimekirän ja seo aastak om hää võimalus noid kombit laembalõ tutvas tetä.
Ka võro keele iistkõnõlõja om sanna-aastaga alostusõn mikandi kõgõ tunnõtumb savvusannakombidõ tutvastegijä, Haani Mooska talo pernaanõ Veeroja Eda. Kuimuudu Mooskal vahtsõt aastakka vasta võeti? «Sanna-aastak alost’ meil iks savvusannah. Kütsemi sanna nii, et saimi kell 00:00 edimädse lõunõ luvva. Soputimi seere virgas ja sälä sirgõs, tennässimi imäimmi ja esäessi,» kõnõlõs Veeroja Eda.
Sanna-aastak om pühendet sannalõ, sannakombilõ, sannaga köüdetüile asjulõ ja inemiisile, kinkalõ om sann tähtsä ja meeleperrä. Sanna-aastaga mõttõ käve vällä aokiränik Sika Rein, iistvõtja om Eesti Maaturismi MTÜ ja takasttoukaja Maaleht.
Sanna-aastaga sündmüisi saa kõrralda egäüts. Noist om võimalik ka tõisilõ teedä anda kodolehe saunatee.ee pääl. Niisama saa säält kodolehe päält perrä uuri, miä sanna-aastagal täpsempä sünnüs.
Ligembät teedüst sannaaastaga man ütenlüümise kotsilõ saa Eesti Maaturismi ühingust Priksi Elini käest, e-posti aadrõs om: saunaaasta2023@maaturism.ee.
Rahmani Jan
Mooska talo pernaanõ Veeroja Eda om sanna-aastaga alostusõn ka võro keele iistkõnõlõja. Sanna-aastakka alost’ Mooska rahvas savvusannan lõunõhiitmisega.
