Jänes tuu õnnõ
Ma kuuli raadiost, et seo aasta om jäneseaasta. Ku mi mõtlõmi, et jänes om üts ara verega heigo, sõs Hiina kallõndri perrä peetäs jän’ot hääs eläjäs, kink seeh om pall’o jõudu ja tarkust.
Jäneseaastal lubatas meile rahalidsõ saisu paranõmist, edenemist tüül ja laabumist armueloh. No rahaga meil viil väega halvastõ ei olõ. Kuiki jo inne joulõ kõnõldi egäl puul, et olõ-i vaia veiervärki tetä, es lasta seo aastavaihtus sukugi veidemb rahha vasta taivast ku minevaasta. Ja ku tüül ja armastusõh kah häste lätt, sõs mõistaki ei vahtsõst aastast inämbät tahta.
