Minevä kolmapäävä Võrol käünü presidenti Karisõ Alarit võtt’ protestilauluga vasta ligi 30-pääline lauluseltskund. Õnnõ mõnõ tunniga kokko tulnu rahvas laulsõ Kalkuna Mari samal hummogul valmis saanut regilaulu «Nursipalu nurina», mink luuminõ sai toukõ Kauksi Ülle laulust-luulõtusõst «Riigiitk». Perän laulmist anti naa sõna ka presidendile üle. Rahmani Jani pilt
NURSIPALU NURINA
Kalkuna Mari
Tere-tere, presidenti, riigikene,
Riigikaitsõ korgõ käsi.
Siin om rahvast kokko tulnu,
Nursipalu aja nurisõmma,
Võromaa aja värisemmä,
Mõtsa, maa, murõhtamma.
Mis saa küll mi kodopaigast,
Vaiksõst, kaunist Võromaast?
Ku ei inämp rahu saa
Uman talon, uman tarõn.
Ku siin mürsu mürisese,
Aknõklaasi klirisese,
Võro liinan võbisõsõ.
Raketi rigudi-rägudi
Üle pää meil lindasõ.
Kas mi olõmi jo sõjan?
Et või kodo kaotada,
Põlistalo är põlada.
Et või vaikusõ är võtta,
Võromaa, Su ohvris tuvva,
Lahkõ rahva lakja aia,
Nursipalo maaha müvvä.
Ilma luba küsümäldä,
Ilma kokko leppimäldä.
Kuis Sinno tagasi laulda?
Kaidsa-kaidsa, hoia-hoia,
Hoia ummi inemiisi!
