Kiränik Kauksi Ülle om vällä käünü plaani kutsu joba seo keväjä kokko võrokõisi kongress. Uurimi, mille säänest asja timä meelest vaia om ja kuimuudu tuu vällä võinu nätä.
* * *
Mille Sa piät tarvilikus kokko kutsu võrokõisi esindüskogo?
Ma olõ tuud pidänü tarvilikus joba 30 aastat vai rohkõmbki. Varrampa ei olõ nii suurt tougõt olnu, a parhilla ma arva, et piäs tuu är tegemä. Om asju, mis toolõ üten avitasõ: pall’o inemise, noidõ hulgan tiidläse, omma jõudnu järeldüsele, et seo maailm säändses ei jää. Ületuutmisõ, maa mürgütämise, raiskamisõga edesi elämine ei saa jakkuda.
Kunagi ütel’ Visseli Agu, et ku maailma karavan püürdmä nakkas, või Võromaa tähtsüs muutuda: karavani kõgõ perämädsest kaamlist või saia kõgõ edimäne. Ja nüüd tuu karavan nakkaski püürdmä sinnäpoolõ, kon nõsõsõ avvu sisse mahepõllumajandus, esi kasvatõt koolisüük, elo kogokunna muudu, veitüga lepmine, kassin eloviis. Tuu kõik, mis om Võromaalõ kõgõ umanõ olnu.
Säälhulgan tasasus ja lihtsüs. Om aig hinnäst miilde tuvva ja mitte laskõ hinnäst periselt maailman är lahusta ja lakja puhku. Ummi väärtüisi tulõ hoita ja edesi anda.
Täämbädsen maailman kõnõldas pall’o põlisrahvist, kes omma misugudsõ ja ei unõta ummi edevanõmbidõ tarkuisi. Põlisrahvas olõmisõ miilde tuumisõga saanu Võromaa hinnäst parõmbalõ hoita.
Kuis tuu võrokõisi kokkotulõminõ võinu vällä nätä?
Ku om tiidä tuu päiv, sis egä külä, selts, laulukuur, vald, kõiksugu asutusõ saava saata kongressilõ uma saadigu. Ka nuu võrokõsõ, kelle sälä takan asutust ei olõ, a kedä vähämbält viis inemist uma allkiräga toetasõ, saava ossa võtta. Asutaja kogo tege kokkokutsmiskirä ja väiku kava, millest kõnõldas. Võiolla valmistas ette ka mõnõ plaani. Kongress tulõ kokko, kullõldas väiku kõnnõ är, arutõdas plaanõ, hääletedäs noidõ üle ja valitas vanõmbidõ kogo, kes kooni järgmädse kongressini vii otsussit ello. Säänestmuudu kongressi omma pall’odõl soomõugrilaisil ja mi naabriil setodõl.
Kas säändse kongressi otsussit kiäki kullõs kah?
Praktika om näüdänü, et noid kullõldas, muidu säändsit kongresse es tettü. Tuu om jõud, selle et egä delegaadi takan om jo mõni külä vai ütisüs.
Ku tulõ näütüses sada delegaati, kellest egäüte sälä takan om kümne inemisega ütisüs, tähendäs tuu tuhandõpäälist koko. Tuu ei olõ sis inämb ütsikult üts organisatsioon, a sais suurõmba hulga võrokõisi iist.
Küsse Rahmani Jan
