17. radokuul kõnõl’ raamadu «Juured Vivva külas» kokkosäädjä Nurmõ Aili Võromaa keskraamadukogon huviliidsilõ, kuis ja mille sääne raamat kokko sai.
Raamat om kokko pantu katõ mineväl aastasaal elänü Vivva küläst peri vele, Loosaarõ Evaldi ja Leesalu Viljati (vele saiva nimmi eestistämisel eri priinime) kirja pantuist matõrjaalõst. Sääl om nii kakkit päivikist, jutukõisi, mälehtüisi ku märgotuisi. Päält tuu om 350leheküleliste kõvvu kaasiga raamatuhe mahtunu hulga pildimatõrjaali. Kokko and raamat üte perre luu, a laembalt ka üte külä luu ja viil laembalt luu tuust, kuis vanastõ Võromaal eleti.
Vivva om külä Orava lähkül ja kuulsa tuu poolõst, et ülemineväl aastasaal elli sääl ettekuulutaja Kordo. Ka Kordo ettekuulutuisist om raamatun juttu.
Raamadu kokkosäädjä om Loosaarõ Evaldi latsõlats Nurmõ Aili, kiä pidä Võrol apteegin proviisoriammõtit. Raamat om timä kingitüs umilõ vanõmbilõ näide 60. pulma-aastapääväs. Et taad raamatut om trükitü õnnõ mõnikümmend tükkü, sis müügist tedä kostki ei lövvä, a Võrol ja Oravil om tä raamadukogon huviliidsilõ lugõmisõs ja kaemisõs olõman.
Rahmani Jan
Raamadu kokkosäädjä Nurmõ Aili. Rahmani Jani pilt
