14aastaganõ Koha Lenna tege hindäle kunstniguna nimme. Ildaaigu sai tä eriavvohinna Wiklandi Iloni noorõ kunstnigu preemiä konkursil. Ka kooli luuvtüüs otsust’ tä tetä kunstinäütüse umist kassipildest.
Lenna opp Osola põhikooli 8. klassin ja om suurõ kunstihuviga. Kunsti om tä opnu peris väikust latsõst pääle. «Alosti Rakveren üten kunstitsõõrin, sis kolisimi perrega Võromaalõ ja no olõ ütessä ja puul aastakka Võro kunstikoolin opnu,» seletäs tä tuud, kuis om kunsti tennü niikavva, ku hinnäst mäletäs.
Luuvtüüs maalinäütüs
Umas katsanda klassi luuvtüüs otsust’ Lenna tetä kunstinäütüse. «Kõik küssevä, midä ma luuvtüüs tetä taha, ja ma es taha midägi uuri, tuu es tundu kuigi põnnõv. A sis mõtli, et ma mõista peris häste joonista ja võinu midägi kunstiga tetä,» kõnõlõs tä.
Parhillatsõs om Osolõ kooli fuajeen sainu pääl timä näütüs kassipiltest. Kokko om kooli sainu pääl kuus Lenna pilti, miä omma tettü akrüülvärvega. «Mu käest om hulga küsütü, mille ma valisi ummi maalõ teemas kassi, a määnestki esierälist põhjust ei olõki. Mullõ lihtsäle miildüse kassi ja ma tahtsõ oppi näid parõmbalõ joonistama,» ütles Lenna.
Noorõ kunstnigu eriavvohind
Seo aasta alostusõn otsust’ Lenna üten lüvvä Wiklandi Iloni noorõ kunstnigu preemiä konkursil. Seokõrd pidi konkursilõ saatma vähembält üte tüü vabalt valitul teemal ja kats tüüd rahvajutu «Luhast leitud naine» perrä. Lenna saatsõ neli pilti, kolm rahvajutu perrä ja üte vabal teemal.
«Edimädse rahvajutupildi pääl om tütrik, kiä kamm uja veeren hiussit. Tõnõ pilt om ütest mehest, kiä kaes imehtünü pilguga kullakotti, miä timä ette om tegünenü. Ja kolmanda pildi pääl näge tuusama miis, kuis tä naanõ vette hüppäs ja om väega hiitünü näoga. Vaba teema pildi pääle joonisti paar tõõsõ planeedi pääl elävät eläjät,» seletäs Lenna ummi pilte vallalõ.
Wiklandi konkurssi peetäs jo 2014. aastagast pääle ja sinnä saava ummi töid saata 14–18aastadsõ noorõ. Konkursil anti vällä üts pääpreemiä ja kolm eriavvohinda, minkast üte sai Koha Lenna. Nii tull’gi täl seo kuu alostusõn Haapsalun umal preemiäl perän kävvü. Preemiä kätteandmisõ üritüsele oll’ kutsutu umbõs 50 inemist, küläliidsile oll’ katõtu suur laud. Konkursi parõmbit töid näüdätäs Iloni Imedemaal välläpanõkil.
Hindamiskogo selet’ Lenna eripreemiä saamist tuuga, et timä pilte pääl oll’ tõisi autoridõ piltega võrrõldõn pall’o tundit.
Noorõ kunstnigu hindä meelest tulõva täl kõgõ parõmbalõ vällä maastigu- ja luudusõpildi. Päält maalmisõ om tä tennü ka savitüüd ja vabal aol miildüs tälle paprõst asjo meisterdä. Lenna tõõsõ hobi omma raamatidõ lugõminõ, juuskminõ ja lühkeisi juttõ kirotaminõ. Viil om tä kats aastakka tandsnu hiphop-tandsu.
Lenna eläs perrega Urvastõ kandin Ruhingu külän. Tä ütles, et maal üten kannu, pinne ja kassõga elämine om tälle väega meeleperrä. Tulõvigun tä peris kunstnigus saia ei mõtlõ, a tälle paistus põnnõv arhitekti ammõt.
Rahmani Elo
Nuur kunstnik Koha Lenna uma kassipildi man. Kokko om Osola kooli fuajeen kõigilõ kaemisõs välän kuus timä maalitut pilti. Rahmani Elo pilt
