Mitmõlõ poolõ Võro liinan omma vällä pantu teedüstahvli, kon om pääl QR-kuut, miä juhatas videodõ pääle, kon kõnõldas Võro paigust ja inemiisist. Jutustasõ inemise, kiä omma tennü võrokeelitsit liinaekskursioonõ «Mu liin, mu kiil».
Pildi pääl ollõv tahvli om üles säetü Karja uulitsalõ vana haigõmaja saina pääle. Tuu abiga saa kullõlda-nätä kattõ juttu: Hõraku Veevi mälehtüisi vanast haigõmajast ja Veeroja Eda juttu legendaarsõst Võro liinaarstist doktor Pihost.
A noil, kiä ei jõvva Võro liina esi paigust teedüstahvlit üles otsi, om võimalik kõiki videoid kaia internetin: visitvoru.ee/voru_linn_mis_raagib_lugusid.
UL
