Seo jutt kuulus letialustõ hulka puhtalt tuuperäst, et käsitles tsipa korõmbiide persoone ellu. Tuuperäst omma ka nime muudõtu.
Päätegeläne om A. Tuu om üts tubli kolhoositüüline, kiä või tetä egäsugust tüüd. Timä vaba ao veetmine om kipõn üteplaaniline ja tuuperäst om tä ajutiselt pantu määnestki truupa üles laduma. Et aga ahumeistre haltuura pääle es libastunu, om pantu tälle «abilises» kats liinast välläsaadõtut, aga muidu kõigildõ ontlikku daami. Arvada, noid peeti liina jaos liiga hääs.
Tüü esi näge vällä nii, et A-lõ ulatõdas kivi vai savi ja tuu pand asja paika (saina). A harisi tuu asjaga nii är, et muudkui kammand: «Litt, anna tivvi! Anna tavvi! Tivvi! Tavvi!»
Sääne huug sai sisse, et A-l läts meelest: soemüürü ei tohe kõrraga pallu laduda, piat laskma kuiuda. Lõpus tuu müür lätski ümbre ja ütele «litile» jala pääle.
Ah jah, A-l oll’ umaette võru keele hääldus. Võõras inemine es pruugi tuust aru saia. Kadunu näitleja ja lavastaja Trass sattõ tuust hääldüsest nii vaimustustõ, et otse minnu ütel rahvapidul mitu kõrda üles ja lask A sõnnu vahtsõst hääldädä.
No vot, A laotu truup sattõ ümbre ja A-lõ kõrraldõdi seltsimehelik kohus. Ma pelgä, et põrõlt om väega rassõ sellätä, mis elukas tuu oll’. Kohtunik küsse A käest sellätüskirjä, kuis vai milles asi juhtu. A pand uma kõnõ kokku väega nappe sõnnuga, täpsembält kuvvõ vai säitsmega. Ärksamp publikum opse kõnõ teksti sõna-sõnalt pähä. Kõnõ oll’ tõtõstõ tuud väärt: «Ma hõitti tüll, et litt, patõ alt!»
Ma lugõsi kah ülikoolin üte marksismi klassiku teosõ läbi. Tuu oll’ Engelsi kõnõ Marxi haua pääl. Puultõist lehekülge pikk ja üts kimmäs mõtõ seen. Egä kõrd, kui rahvas matustõl haua man külmetäs, tulõ tuu kõnõ mullõ miilde.
A pand uma kõnnõga Engelsilõ selgelt är. Esiki kolhoosi esimiis ollõv tuu pähä opnu ja kutsnu paar traktoristi põllu päält ärä kullõma, kas tä õigõlõ hääldäs. Ollõv ollu inämb-vähämb. Esimiis oll’ põhjalik miis ja kui tä (purjunult) kirutõt allkiri pangan läbi es lähä, lask tä kutsu autojuht W, kiä eluaig oll’ timä allkirjä sõidulehti pääl võltsnu. Autojuht kirut’ alla ja inemise saie uma palga ilustõ kätte.
Seltsimehelik kohus õnnõs kedägi surma es mõista ja A tekk’ viil pall’u mehetegusid. «Litt» parasi kah är ja tekk’ hulga tegusid. Ainukõnõ vahe, et nuu es olõ meheteo, olli naisõteo. A mis vahet?
Pulga Jaan
