Minevä kuu peeti Tal’nan orientiirüjide suurkoko. Arotimi sääl, kuis taad spordialla üles kittä, et inemise jõudnu inämb tervüsele parõmba eloviie ja luudusõ mano.
Unõmeditsiiniga tegelemise aost om mul peri tiidmine, et suurõmb jago kundõsit omma hädän uma suurõ kaaluga. Ka aokirändüs kirotas, et kolmas jago täämbädse ao latsi omma ülekaalun ja liigutasõ hinnäst veidü.
Sinnä orientiirüjide suurkogolõ olli tulnu inemise keskkunnaammõtist, kiä pei katõtunnidsõ loengu. Nä kõnõli tõõmeeli, et orientiirüjä tegevä luudusõlõ ja mõtsalõ liiga. Sõkva mõtsaalodsõ är ja toolõ tulõs panda piir vai juuskõ liinan ja alõvin.
«Tulõ taivas appi!» tull’ mullõ tuu jutu pääle kunaginõ Ansipi ütelüs päähä. Olõ päält 40 aasta mõtsan orientiirümän käünü. Olõ käünü kaeman ka noid paiku, kon mõnõ aasta iist om võistõldu, ja nännü, et ratu, kon inemise omma juusknu, ei lövvä paari aasta peräst inämb üleski.
Mullõ tunnus, et midä inämb inemist luudusõst kavvõmbalõ viiä, toda hullõmbas asi lätt. Ku tahami hindäle säänest ütiskunda, kon inemise omma ülekaalun ja ei tiiä luudusõst midägi, sis panõmigi nä kohegi ruumi kinni ja lasõmi õnnõ ekraani kaia. Sis võimi kimmä olla, et õigõ pia saami hindäle väega haigõ ütiskunna.
Orientiirümise mõjjo mõtsalõ om uuritu ja halvu näütit ei olõ vällä tuudu. Roodsin ja Soomõn käü suurõmbil orientiirümisvõistlusil 15 000 – 16 000 inemist mõtsan juuskman. Ka sääl om löütü, et mõnõ aasta peräst ratu inämb nätä ei olõ.
Ja samal aol, ku meil kõnõldas orientiirümise mõost mõtsalõ, võetas pall’o mõtsa maaha, veetäs sisse vahtsit mõtsateid, sõidõtas suuri massinidõga mõtsaalotsit pite. Ka ATVdõga rallitas mõtsa all ümbre. Inemise jalg om aoarvamisõ alostusõst jälgi mõtsa ala jätnü ja tuu om kül luudusõlõ kõgõ väikumb kah’o, võrrõldõn tuuga, miä periselt ümbretsõõri sünnüs.
Orientiirüjide suurkogol lätsimi kül noidõ keskkunnaammõtnigõga sõbraligult lakja, a mullõ jäi sisse iks sääne tunnõ, et tegelemi vahepääl asjuga ja teemi probleeme tuust, millest periselt probleeme tetä es tohtnu.
Pindmaa Aigar
Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.
