Paiku, minkast laul tettü, om küländ hulga. No om noidõ siän ka Varstu. Pulga Jaani vahtsõn laulun «Varstu hirm ja arm» tulõtõdas miilde Jaani latsõpõlvõaigu, a lõpus jõutas täämbäste päivä vällä.
Mõnõ ao iist sai Jaan Varstun kohvipoodi ussõ pääl kokko üte mehega, kiä tedä teret’. Tull’ vällä, et Jaan tundsõ tuu mehe essä ja tuu Varstust peri miis tiidse Jaani. «Tä ütel’, et om mu lugusiid kullõlnu, sääl om kõkkõ, a Varstust ei olõ üttegi sõnna. Ja jumala õigõ!» kõnõlõs Pulga Jaan tuust, kuis laulu tegemise mõtõ pääle naas’.
Nii istõgi tä lavva taadõ ja naas’ kirotama. Laululuuja päähä tulli mõttõ ja mälehtüse nuurusaost ja tä naas’ näid kirja pandma. Paprõ pääle sai hulga sündmüisi ja inemiisi, kiä kunagi Varstun elänü omma. «Panni nuu asja kõik kirja, a sis selgu, et tuu kõik om nii kaugõ minevik, inemise ei mäletä tuud inämb. Noid, kiä mäletäse, või vast katõ käe sõrmi pääl üles lukõ,» seletäs laulutegijä.
A om üts asi, miä köüt Varstut vanal aol ja täämbädsel pääväl. Nuu omma Varstu kesktii veeren kasuva tsireli. Nigu vahtsõ laulu salm ütles:
Nigu toona häitses tsirel kesktii veeren.
Häitses nii, et pelgät, ärä läpätäs.
Varstu tsireli õks uma rahva meelen,
maikuun kotust tahas läbi hüpädä.
«Näid om igäsugutside massindega sõkutu, nõstõtu muialõ ja maha lõigatu, a õks tulõva maa seest vällä. Ja õks häitsese. Ja mis sa säändse asja vasta võitlõt, mis om luudusõ puult säetü – säänest tulõ nauti! Pruuvsõ lauluga sinnä vällä jõuda, et elämi ja naudimi noid tsireliid,» seletäs Pulga Jaan.
Laulu lõpusalmin oodõtas kodo tagasi noid, kiä omma noorõst pääst Varstust är suurõ ja laja ilma pääle õnnõ otsma lännü:
Tulkõ kõik, kedä rännümehe veri
noorõlt otsma aie muialt umma saart,
Varstun uut teid tsireliide meri,
avvuraha egaüts säält rinda saa.
Autor kirot’ laulu mitu kõrda ümbre, a peräkõrd sai asi nii kavvõlõ, et võisõ laulu valmis tunnista. Minevä kuu perämädsel pääväl mängiti ja laulõti lugu säälsaman Varstu lähkül Kõrvipalu stuudion linti. Suurõmba jao laulust laulsõ sisse Pulga Jaan esi, tsipa aviti lauluga ka Mõtussõ Liivi ja Laube Kadri, kiä mäng luun ka lõõtspilli. Klarnõtit ja kontrabassi mäng Niglassõ Ago, kiä sääd’ muusigapala ka kokko ja tekk’ tarviligu puutrõtüü, et laul kõrraligult kõlanu.
Laube Kadri tekk’ laululõ ka video ja no saa egäüts tuud Youtube’ist kaia ja kullõlda. Laulu lövvät üles, ku kirotat otsingulõ «Varstu hirm ja arm».
Rahmani Jan
Laulu autor ja esitäjä Pulga Jaan luku linti laulman. Pilt Laube Kadri videost
