Järgmädsel katõl aastagal otsva Itaalia, Türgü, Poola ja Eesti nuuri- ja kultuuritüütäjä Euruupa Liidu tugõmisõl viise, kuimuudu noorõ hinnäst kogokunna osana võissi tunda ja näid inämb kultuuri mano tuvva. Edimäst kõrda saiva nelä riigi kultuuri- ja nuuritüütäjä ja kultuuriperändüse huvilidsõ kogokunnaliikmõ kokko 4.–10. lehekuul Rõugõ vallan.
Ütel pääväl kaiva kultuurisaadigu ka Mehkamaa kultuuriello ja Fastrõ Mariko ni Jüvä Sullõv kõnõli näile väikeisist kiilist. Muu hulgan aviti projektist ossavõtja Tarto Ülikooli keeleprogrammi «Neurotõlge» abiga võrokeelitsele Vikipeediäle mõnõ artikli kirota. Pildi pääl seletäs Jüvä Sullõv, midä tähendäs inämbüisi väikeisi kiili jaos umakeeline Vikipeediä.
Laube Kadri
Malinska-Marga Urszula pilt
