18. lehekuul Sännä kultuurimõisan peetü Jaigi Juhani võrokiilse jutupäävä kõgõ parõmbas kõnõlõjas valõ kullõja Rõugõ põhikooli 3. klassi poisi Trummi Arturi, kiä kõnõl’ Jaigi perrä tett jutu «Tohu hopõn». Arturit juhend’ oppaja Nagla Anneli ja tedä saadi jutupääväl ka vanõmba.

Tõsõ kotussõ sai Võro Sõlekese latsiaia esindüs: Kõvatu Brianna, Terava Karl, Traksi Hasso Herman ja Valtu Ranar Timo. Näide lugu oll’ juhendaja Päevalilli Maia kirotõt «Kaotsilännü paradiis». Pilliga saatsõ näid oppaja Sika Lea.

Kolmanda kotussõ sai Haani kooli 8. klassi opilanõ Rõõmusoksa Liisbet, kiä kõnõl’ Sinisalu Katre luu «14aastadsõ elost». Liisbetti juhend’ oppaja Leidi Kersti.

Neländä kotussõ jao helle sai Väimälä latsiaia lats Laanõ Uku, kiä kõnõl’ üten esä Laanõ Valdissõga anekdoodi «Kuis susi raamatopoodih käve».

Katõlõ kõgõ suurõmba ossavõtjaskunnaga jutukõnõlõjidõ juhendajalõ Pazuhanitši Astalõ Mõnistõ koolist ja Sulevi Urvele Harglõ koolist kinkse Papa Kreutzwaldi Õueteatri näütlejä Jansonsi Silvi näütemänge kogomigu, kon neli näütemängu, miä omma hoovitiatri esitüsen ka Võro kaejidõ ette jõudnu.

Võro instituudi kõrraldõdul jutupääväl lei üten 20 last katsast Vana-Võromaa latsiaiast ni koolist. Jaigi-jutupäävä peeti neländät kõrda.

UL

Jaigi-jutupäävä võitja Trummi Artur. Kabuna Kaile pilt