Haani koolin om saanu kombõs opada kooliaasta perämädsen tüü- ja tehnoloogiaoppusõ tunnin kõovihtu tegemist. Nii tetti vihtu ka timahava.
«Latsõ saiva vihtu tegemisega väega häste nakkama. Kõgõ rassõmb oll’ vast kooli lähkült kõlvoliidsi kõoossõ löüdmine,» võtt oppaja Rüütli Paavo vihategemise tunni kokko.
Et Haanimaa inemise omma jo vanast aost tunnõdu puukäsitüü tegijä, peetäs vannust kombist koolioppusõ man täämbä kah luku. «Olõmi opnu ka luudõ ja pudrupöörüssit tegemä. Timahava keväjä olnu paikuskunsti pääväl Vällämäel opõ latsõ puust rihä tegemist. Õga kevväi olõmi latsiga ka vahtrõ tikanu. A kõgõ keerolidsõmb om muidogi olnu haanimehe suusõ tegemine,» seletäs tüü- ja tehnoloogiaoppusõ oppaja.
UL
Rüütli Paavo hoit käen tunnin valmis tettüt kõovihta. Simmi Silleriinu pilt
