Täämbädsel piitrepääväl (29.06) võissi kaia mõnt seo pühämehe nime tähendüsega nimme.
Näütüses Pedras (39 kandjat) om nimi, miä panti õnnõ Vahtsõ-Kasaritsa mõisa üten talun Kol’ereinu (Koloreino) külän. Nime saanu peremiis oll’ Tanila poig Piitre. Kuigi tõõndust jääs veitüs, võisõ kiäki edevanõmb olla jälleki Piitre ehk kõnnõkeelitselt Petra. Nimi Pedras sisaldaski edenimme Pedra ~ Petra ja saksa keele umasütlejä käänusse lõppu -s. Edimält kirutõdi nimme vanan kiräviien Peddras. Rõugõ opõtaja taht’ Piitrele edimält panda priinimme Mäe, selle et Piitre oll’ Rõugõ keriguraamatin Hilepi Mäe Tanila, vahel ka lihtsalt Mäe Tanila poig, a püsümä jäi hingelugõmistõ kirja pant priinimi.
Hääldüsperätsel nimel Peedosk om 30 kandjat, vanan kiräviien nimekujul Pedosk 72 kandjat. Seo nimi panti Räpinä kerigumõisan Saarõkülän. Kats peremiist, kiä seo nime saiva, olli Peedo Jaani poja Andres ja Jaan. Nii mõisa ku kerigu paprin om kirän ka nimi Pari Jaan (Parri Jaan). Tuu om Räpinä Peedoskidõ küläkeeline lisanimi, 1826 ka talunimi, miä tulõ mõtsa, suud ja räbästikku tähendäväst sõnast pari. Täämbädse pääväni kutsutas piä ekä Peedoskit Räpinä kihlkunnan paigapäälidse nimega Pari. Priinime andnu lisanimi Peedo om muiduki üts Piitre mugandus.
Priinimel Peedel om 34 kandjat, veidükese kandjit om ka vanan kiräviien nimekujul Pedel. Tuu nimi panti Suurõ-Kambja mõisan Lauri talu peremehe Ado perrele. Aadu oll’ Mikko Peetso Kaarli poig, Kambja personaalraamatun kirotõdi tedä Peetso Ado Pedel. Peetso vai Peeds’o tulõ muiduki jäl Piitrest. Priinime tegemisel om võet tuu nime edimäne osa Peed-, manu om tulõtõt -el.
Pühä Piitre vai ladina keele muudu Peetrus sündü ja elli täüsmehes hoobis uma juudi nime Simmun (Siimon) all, selle tundas tedä kerikun ka ku Siimon Peetrust. Kreeka keelen kirotõdun vahtsõ tõstamendi Jaani (Johannese) evangeeliumin and’ Jeesus tälle timä kõvvust ja kimmüst märkvä arameakeelidse lisanime Keefas ’kivi, kalju’, miä om säälsaman ka kreeka kiilde tõlgit, Petros, ildamba ladina muudu Petrus. Tuud nimme om edesigi tõlgit, näütüses olkõ Eesti mehenimi Kalju vai Bulgaaria mehenimi Kamen.
Saarõ Evar
Rubriigin kõnõldas perekunnanimmi periolõmisõst ja tähendüsest.
