Suvi om üts õnnistõt aig. Ku pall’o hääd pakk tä kõiki miili jaos!

Korssi uma Paju uulidsa hoovinukan valmis saanuid tomatiid ja kurkõ, nopõ mano paar füüsalit, peotävve tilli, nuhuti floksõ ja daalijit. Seo rikkus om nii mahlanõ ja täütvä!

Suvi om aig liiku. Mullõ miildüs olla välänpuul Võro liina, löüdä üttemuudu inemiisiga ütenhengämist, näütüses tantra-, Jaania ja Ühendüse festivalil, miä omma alkoholist ja meelemürkest prii.

Võro liinan om mu hengelaadiga inemiisi veidü vai ma sis ei tunnõ näid. Õnnõs om üts tantrat praktisiirvä paarikõnõ. Võromaal om jooga- ja meditatsioonisõpru õks kah, a vahepääl tulõ mullõ pääle igätsüs näid hulgõmb nätä. Et ma ei piäsi umma olõmist tõlkma, seletämä, a saa olla ma esi, uman kõgõ loomulikumban olõkin.

Miä pututas mõttõseldsiliidsi, sis õkva säändsil kuunkäümiisil lövvä vahtsit sõpru ja lämmistä vannu tutvuisi üles.

Mul omma elon mõnõ lemmikmehe, nigu Jüssi Fred ja tõõsõ säändse luudusõmehe. A mu lemmikmiihi siän om ka Vooglaiu Ülo, kel kävemi külän. Vihma naas’ sadama, taivas oll’ hüdsimust, a Ülo helgäs’ nigu päiv uma mõttõvärsküse ja -selgüsega. Müts maaha säändside miihi iin, kiä hoitva egäväste uma nuurusõ alalõ filosoofihengen. Seo, kuis tä kõnõlõs, maru kipõstõ vastas ja selgele kuuld, kaemalda umalõ bioloogilidsõlõ vannusõlõ, om suurõperäne. Elägu filosoofi, noorõ ja vanõmba!

Sõbõr mängse Ülo Weltmeistri akordioni pääl Pärdi Arvo «Ukuaru valssi». Neo hetke, seo suvõvalgus ja värskust andva vihm, ruusõ hõng…

Hindä arõndamisõ festivaalõl lövvä mõttõseldsiliidsi, kinka üten luvva muusikat ja improvisiiri. Nii sai ildaaigu kokko paari professionaaliga, kinka lihtsäle nigu esihindäst tekkü luu ja mi teemi joba plaanõ sügüseidsis kontsõrdõs. Edimäne näist tulõ Rõugõn Ööbikuoron 9. süküskuul, kon plaanimi suurt väelaulõ ütenlaulmist.

Lumiste Kati

Kiränik Lumiste Kati and värskit mõttit, kuimuudu egäpääväello vaeldust löüdä ja märgotas tuust, miä parasjago süäme pääl.