Seo nädälilõpp, 14. ja 15. hainakuul, peetäs folgipito Mooste Elohelü. Katõl pääväl saa Mooste esi paigun kullõlda kontsõrtõ, tüütarrin üten lüvvä, laulda ja tandsi. Nigu kombõs saanu om, tulõ pido tõõsõl pääväl rahvalaulu-tüütlüisi võistluskontsõrt. Et timahavanõ võistluslugu kõnõlõs kolmõst rändäjäst krahvist, kiä tulõva näio kätt pallõma, om rändämise teemä ka festivali tõisi tegemiisi man.
Rändämise teemä tugõmisõs omma kõrraldaja vällä märknü päält võistluslaulu ka esieräliidsi tegemisi. «Inne festivalli võtva kats rändmuusikut, Niglasõ Ago ja Laube Kadri, uma kontrabassi, klarneti ja mitu lõõdsaga pilli ja läävä Vanna Võromaad pite hääletämä. Pässäküüdiga nimä seiklõsõ, mängvä pilli ja kaesõ, kuis nä rändäjidenä jõudva festivali alostusõs Moostele,» seletäs pido projektijuht Tammõ Liivi.
Pido nakkas pääle joba kell 15 eelkontsõrdiga Mehikuurman. Pidolinõ vallategemine Mooste folgikua iin om kell 18 ja päält tuud nakkasõ pääle edimädse päävä kontsõrdi, kon timahava astva üles Kalkuna Mari, ansambli Eesti Keeled ja Kukerpillid. «Meil om joba mitu aastat riidi õdak olnu sääne, kon saa lõpus tandsi, a inne tuud saa kullõlda rahvamuusika valdkunnan tsihti näütävät professionaalsõt muusikat,» kõnõlõs Tammõ Liivi.
Pido tõõsõl pääväl om mitmõn Mooste mõisa paigan pääväprogramm. Kontsõrdi omma Vanaajamajan, Veskitiatrin ja Silotornin. Nigu Mooste pidolõ kombõs, võetas tarvitustõ ka vahtsõnõ kontsõrdipaik, miä om timahava Siimnejaam. Pääväkontsõrtõ and kokko 14 kuunsaisu.
Päävädse tegemise juhatasõ sisse õdagudsõ võistluskontsõrdi. Seokõrd võtva mõõti kümme ansamblit, kiä esitäse umma nägemüst vahtsõmbast rahvalaulust «Ma saisi korgõl mäe pääl». Päält tuu saava nä esitä viil tõõsõ vabalt valitu eesti rahvaviisi tüütlüse. Võislusõ hindamiskogon omma timahava Särje Taive, Kanni Tuule, Ehala Olav, Aintsi Tauno ja Tammõ Arno. Uma avvohinna and vällä ka festivali patroon Rüütli Ingrid ja kontsõrdikullõja saava kah uma lemmiku valli.
«Mu jaos om Mooste Elohelü võlu tuu, et taa ei olõ väega suur festival, om isiklik. Tähelepandmist jakkus egäle muusikulõ ja kooslusõlõ. Seo om paik, kon vaihta mõttit, saia tõisist esinejist inspiratsiooni ja näidega tutvas,» seletäs Tammõ Liivi. A pido kand timä meelest ka laembat mõtõt. «Seol festivalil om aoluulidsõlt olnu sääne tähendüs, et taa om üts pusletükk Vana-Võromaa perimüse edesikandmisõ man. Arhiivist löüdäs üles vana viie ja noid luvvas ja esitedäs tan vahtsõst,» seletäs tä.
Mooste Elohelü kavva ja ligembät teedüst pido kotsilõ saa kaia kodolehe moostefolk.ee päält.
Rahmani Jan
Mooste Elohelü projektijuht Tammõ Liivi. Rahmani Jani pilt
