Talvõl tull’ meil mõtõ matkata läbi Urvastõ kihlkunna õgõvjoonõn. Youtube’in om hulga säändsit videoluujit, kiä omma pruuvnu matkata õgõvjoonõn näütüses läbi Walesi, New Orleansi vai Vahtsõ-Meremaa. Näide tii pääle jääs alalõpmalda mitmõsugumaidsi takistuisi, näütüses mäe, talu, lambaaia, suurõ jõõ ni muudki.

Mi mõtlimi, et tervet Eestit ei saa kõrraga ette võtta ja inne võinu pruuvi näütüses kihlkunnaga, sis maakunnaga ja edesi saa kaia, kuis lätt. Maa-ammõti ja Google’i kaartõ perrä joonistimi õgõvjoonõ läbi Urvastõ kihlkunna, mis nakas’ Koorastõ mõtsast Alopi uja päält ja lõppi Soomõ külän Jaugamõisan. Kokko lubasi kaart 19 km matka, miä läts’ läbi mõtsu, lankõ, nurmi ja ka üle mitmõ tsill’ukõsõ uja. Tuu joonõ pääl paistu tiikund sääne, minkast jalg ni jõud üte pääväga üle käü.

Naksimi katõkõisi astma hummogu kümne aol, varasuvidsõ pääväkuuma kottalõ pall’o paksult rõivin, et hinnäst kihulaisi iist kaitsa. Ütest telefonist kaimi kõik aig kaarti ja salvõstimi äpiga tultut tiikunda, tõsõga teimi pilte. Hindä jaos säädsemi riigli, et joonõst või kõrvalõ minnä kõgõ rohkõmb 25 meetrit, et inämb-vähämb õgõvjuun meist perrä jäänü.

Edimädse 15 miitre pääl saiva jala joba likõs, ku astsõmi uutmalda turbamulku kesk raotut. Tuust es olõ hätä, selle et järgmädse kats kilomiitret olli kõva pääväpaistõ all ja kõik kuivi är.

Suurõmbas takistustõs saiva mitmõsugumadsõ uja, midä kaardi päält häste nätä ei olõ. Nelländä kilomiitre pääl oll’ kopral pia 10 miitret lagja kraav üles paisutõt. Õnnõs saimi sääl ja ka mõnõ tõsõ kotusõ pääl üle kopratammi kõndi, nii et jala likõs es saa. Halvõmbidõ läts’ kongi mõtsu seen, kon pidimi põlvilõ vii seest läbi käümä ja üte kõrra eski küllüle sadama. Kolmandigu tii pääl sai selges, ei kuikina ollimi esi higist ni kraaviviist likõ, oll’ joogivett veidü üten saanu ja läts’ vaia ütte boksipiätüst, kon imä autuga tii pääle vasta tull’.

Kõgõ rassõmb ja vastikumb oll’ terve matka aol võsu – sääne harvõmbas võtmata võsu, kon tull’ katõ käega ossõ vaihõl tiid tetä. Tollõst viil hullõmb oll’ harvõndõt võsu, kon ossa olli maaha videlemä jätetü ja võisõ vai jala är murda. Kümme miitret säändse tii kõndmist võtsõ kümme minutit ja püksiseere olliva peräst mulgulidsõ.

Üts suurõmbit ni kahtlasõmbit kotussit, kost läbipäsemine es olõ sukugi kimmäs ega inne läbi testitü, oll’ Antsla jõgi. Kotusõpääline miis, kedä inne jõõkonnu pääle jõudmist näimi, kõnõl’, et siist mi külh läbi ei saa, minku mi no ummõtõ tiid pite. A mi iks tahtsõmi umma õgõvjuunt saia ni lätsimi uurma, mis värk om. Tuu om sääne andsak jõgi, mis om õnnõ kats miitret lagja, a mõnõ kotusõ pääl ka sama pall’o sükäv, nii et jalaga läbi ei saa. Mõtlimi ja passõmi sääl tükk aigu, miä nüüt saa, kas Antsla jõgi lõpõtas mi retke, kas ikk valla ja kodo minek. Peräkõrd otsustimi, et kõgõ parõmb om rõiva säläst aia ni üle ujjo, säläkoti saa üle visada. Nii mi teimiki ja peräst oll’ võitja tunnõ, ku viil kuiva suka kah jalga saimi ja tii edesi läts’. Õnnõ et tuu jandi pääle läts’ meil tunn aigu. Kell oll’ joba viis õdaguspoolõ ja puul tiid viil iin. Edesi läts’ tii virka kooni Lambahanna ujani, kost jalg inämb sukugi es nõsõ läbi sumpama. Lätsimi üle truuba, et hindä tervüst ja tii kiirust alalõ hoita. Tuu jäie rohkõmb ku 25 miitret jutist kõrvalõ, nii et sääl paigan kuuli ka õgõvjoonõmatk.

Kihlkunna läbi matkamisõ himo oll’ sõski alalõ ja edesi lätsimi säält, kost oll’ kõgõ õgvõmb ja parõmb tii, vaihõpääl üle nurmi, mõtsateid ja ruusatiid pite. Jala leivä joba tuld vällä ja samm oll’ lühküs jäänü. Peräle saimi Jaugamõisalõ kellä kümne aol õdagu ja miil oll’ hää, et lõppu jõudsõmi. Kõgõ tipus pidimi viil kilomiitre tagasi kah kõndma, kooni auto perrä tull’, selle et saisma jäien olõs kihulasõ mi viimädse eloraasakõsõ är purõnu.

Aituma häile inemiisile, kiä meid uma moro päält läbi lubasiva ja pinne kallalõ es aja! Kokko oll’ tuu kõik üts väkev matk ja vast proovimi vahtsõst joba ristipiten kihlkunnast läbi matkada – Järverest Kassilõ.

Saarõ Hipp

Üleujuminõ Antsla jõõst, miä oll’ kitsäs, a sükäv. Saarõ Hipõ pilt