Puulpäävä, 5. põimukuul peetäs kiränik Mihkelsoni Ene (1944–2017) inneskidsen maakoton Haanimaal Peedomäel suvõseminääri.
Seminär om vällä kasunu kirändüsligõ suvõkuulõ sar’ast laulu «Õrn ööbik» autori Wulff-Õisi Gustavi majamuusõumin Otõpää lähkül Nüplin. Peedomäele tuldas suvõl kirändüsest kõnõlõma joba tõõnõ kõrd.
Suvõseminärile «Kiränigu kotussõ ja paiga» tulõva kõnõlõja Võrost ja Sännäst kooni Tal’na, Tarto ja Muhu saarõni. Katsan ettekandõn tulõ juttu kotussist ja paigust Kõivu Madisõ, Ast Rumori Karli ja Mihkelsoni Ene loomingun. Kõnõldas sõnnu «kotus» ja «paik» esi tähendüisist, aigu jääs ka luulõtuisi lugõmisõs.
UL
