Seod nimme kand Eestin 86 inemist. Nimest om olõman ka varjants Saukand 10 kandjaga. Nimi panti õnnõ üten paigan: Räpinä kihlkunna Kahkva mõisa Suurõ-Viirksu külän neläle velele perridega. Näide lisanimi oll’ Sõukõsõ (Söukese), tuust omgi priinimi moodustõt, võttõn lisanime algusõ Sõuk- ja pandõn manu Räpinäle tüüpilidse nimelõpu -and. Lisanimest lövvüs ka XIX aastasaal kirja pantut varjantsi Saukõsõ (Саукесе), vastavalt om a-ga naat kirutama ka priinimme.
Ka talunimi 1826. aastaga hingelugõmisõn om Söukese, a kõikin varatsõmbin hingelugõmiisin om velli essä säälsaman talun kirja pant ku Lepikese Andrõssõ Jüri (koolnu 1807). Huvitav, et just hingelugõmisõn 1826, kon om kirän priinimi, om essä kirutõt tõsõ nimega: Viia Kürsä Jüri (Wija Kürsa Jürri). Võissi arvada, et Lepikese Andrõs oll’ kas talukotussõ vai naasõesä nimi, a Jüri esi oll’ peri Viia Kürsä hõimust. Tuust hõimust om teedüs 1731. aastagast, ku Kuuksi külän omma elänü Wija Kürsa Peep ja Kürsa Hans, mõlõmba vinneusulidsõ ja Vinne poolõ päält (arvada mitte kavvõmbast ku üle jõõ Setomaalt) tulnu. Köüdüsse Vinne poolõga (Setomaaga?) olli ka Sõukõsõ Jüri poigõl. Kõgõ vanõmbal pojal Mihklil olli vinne nimega naanõ ja latsõ, 1807 om tä Kahkvalt är pagõnu ja perän tagasi tulnu, kandõn vinneperätses muudõtut nimme Mihhail Jegorov.
Sõukõsõ lisanime seletüses ei kõlba sõna sõuke ’sääne’, selle et tuu om Saarõ- ja Läänemaa sõna. Häste ei kõlba ka mulgi ja Lõuna-Tartumaa sõna sõu ~ sõuke ’sõba, kõrik’, selle et Ida-Võrumaa ja Setomaa uma sõna tuu rõivatükü jaos om iks olnu kõrik.
Kõgõ usutavambalt om Sõukõsõ lisanimi peri vinne muudu edenimest Savka (Са́вка ~ Са́фка), mink alussõs võiva olla kats vinne õigõusu kalendrinimme, kas Savva vai Saveli. Saukõisist vai sõukõisist kõnõldi sõs mitmuslikult ja hellitüsliitega, õkva nigu ka tuusama kandi lepikeisist (lepikese’). Või olla, et Virumaal tegünü priinimi Saukas om samma vinneperätse inemisenime peritollu. Läti latgale perekunnanimmist Saukāns ja Sauka om kimmäle teedä, et nuu tulõva vinne muudu inemisenimest Savka < Saveli.
Saarõ Evar
Rubriigin kõnõldas perekunnanimmi periolõmisõst ja tähendüsest.
