Lõugahusõga «Kiil suust vällä!» kutsutas timahava huviliidsi üles nakkama võro keele agendis.

Joba neläs aasta kuts Võro instituut noid, kiä ei häbendä umma kiilt kõnõlda, nakkama võro keele agendis. Agent saa kanda rõnnamärki vai telli hindäle agendihammõ ja lupa võro keele nädälil (märdikuu edimäne täüsnätäl) ummi tegemiisi inämb võro keelen toimõnda ja tõisigi umma kiilt pruukma härgütä.

Seo aasta agendikampaania lõugahus om «Kiil suust vällä!» Säändse lõugahusõ paksõ Näoraamadu grupin vällä Mustmaa Ulvi. «Mu meelest om seo häste mänguline lausõ ja julgustas keelega nall’a kah tegemä,» löüd agendikampaania kõrraldaja Toomõ Triin. Timä jutu perrä om seo lõugahus joba härgütänü mitund varatsõmba aasta võro keele agenti uman kodopaigan vahtsit tegemiisi vällä märkmä.

Nuu, kiä tahtva timahava võro keele agendiammõtit pitä, saava hindäle kooni 18. rehekuuni telli vahtsõ agendihammõ. Hammit saa telli veebipoodist umapuut.ee. A agent või pruuki ka varatsõmbidõ aastidõ hamõt vai kanda lihtsäle rõnnamärki.

Varatsõmbidõ kogõmuisi perrä tiid Toomõ Triin üteldä, et agendis tahtjit tulõ üle Eesti, peris suur võrokõisi kogokund om Tal’nan. «A päämiselt om iks Võromaa rahvas: oppaja, müüjä, rahvamajju inemise,» seletäs tä.

Võro keele nädäli lõugahuisi ja hammit om agendikampaanjidõ alostusõst pääle kujondanu tunnõt disainimiis Luiga Kristjan. «Et ma esi olõ Võrolt peri, sis om kõgõ hää seo paigaga köüdetüid töid tetä. Perämäidsil aastil om Võro instituudiga olnu kimmäs kuuntüü: om tett põnõvit asju,» kitt Luiga Kristjan.

Ligembät teedüst agendikampaania kotsilõ saa Võro instituudi kodolehe wi.ee päält.

Rahmani Jan

Kujondaja Luiga Kristjan vahtsõ agendikampaania sümboolikat kujondaman. Pilt Luiga Kristjani eräkogost