Salmõl om nigu kats ello: üts egäpääväne kavvõn vahtsõl kodomaal Kanadan ja tõnõ käkitü sügäväle süämehe – kolmveeränd elost hoiõtu egäväne kodoigätsüs. Tuu om tedä takast tsusknu nigu tsirgupoiga meelen pidämä pesäpaika, kon omma juurõ, avvu seen hoitma imäkiilt ja esämaad.

Inämb ku 35 aastat oll’ tä võrokõisi kuundisõ «juhtoinas». Kõgõ suurõmb rõõm oll’ kodomaalt pakku lännüisi jaos Eesti vabas saaminõ. Vabadusõ tagasitulõk kodomaalõ pandsõ näide pään lambikõsõ palama – kuis saasi tukõ kodokõisi uma väiku jõuga.

Helde süämega kaeti läbi koton uma raamaduriioli ja kor’ati kokko inämp ku 5369 raamatut Võromaa raamadukogodõlõ, sinnä mano viil hindä sugulaisilõ-tutvilõ saadõtu raamadulaadungi. Võro haigla jaos saadõti arstirohtõ, diagnostilist aparatuuri, tsõõrtuulõ, jalotusraamõ ja muud. Võro gümnaasium sai eräle National Geographicu numbrõ. Võromaa kiränigu saiva tukõ Eesti rahva saatusõ kirjapanõkis. Eesti Imä kujo tsiibu ala Rõugõn omma kah Kanada ja Ameerika võrokõisi lämmä käe tukõ andnu. Ja hulga egäsugumast api viil.

Salmõ taht iks teedä, kuis koton Võromaal eletäs. Tä süä lätt lämmäs, ku saa kätte Uma Lehe. Sis unõhtas tä hinnäst mõtlõma imäkeelele ja Võromaalõ. Lugõ üte hengetõmbõga läbi, võtt vahtsõst kätte ja lugõ mõnt kotust viil üle. Kompvekis omma Sulbi ja Sõmmõrpalo vai Kanepi inemiisiga köüdetü luu. Sis lätt aoleht edesi tõisi võro keele mõistjidõ kätte.

Juubõlinummõr 100 om Salmõ jaos kõva sõna, a illos kah! Süküskuu edimädsel pääväl om kodomaa lipuehten latsi tarkusõpäävä avvus, a illos om mõtõlda, et Salmõ sai kah vaimusilmän umal sünnüpääväl lipumerd nätä.

Ma soovi saa aasta piirist üle astnulõ kangõlõ võromaalaisi hääle haldjalõ viil pall’o tervüist ja energiät. Iks edesi lämmä süäme ja rõõmsa meelega!

Hirvlaanõ Milvi