Meil kõigil omma latsõpõlvõst üten saadu mustri ja haava. Suvõl lei festivalõl üten mitmõn tüütarõn ja jututsõõrin, kon pututõdi säändsit häti, miä köüdetü ka seksuaalsusõga.
Statistika perrä om egäst kümnest türtikust vähembält katsaga halvastõ ümbre käütü. Ka pall’o poisi olõ-i tuust päsnü. Tuuga tulõ tegeldä suurõst pääst, ku mi tahami kõrralist paariläbikäümist. Mi ei saa ja ei võiki ummist latsõpõlvõhaavust müüdä kaia, muidu kõrdami tuud ummi latsiga ja kannami haigõt üllenpidämist edesi.
Ku olõt suhtõn ja ei tiiä, kuis ütstõõsõ hengehätile ruumi tetä, sis tuu jaos om mitmit võimaluisi ja tehnikit.
Piaaigu egäüts meist võtt hindäga üten hengehädä latsõpõlvõst. Paariläbikäümise omma mi suurõmba oppaja ja kõgõ parõmba piigli. Pääle läbikäümise alostusõ (armumisõ) faasi nakkasõ mi hädä vällä paistuma. Inemise valukihä läävä käümä, naatas reagiirmä tõõsõ poolõ ütlemiisile ja tegodõlõ ja inämbüs läbikäümiisi astus õigõ pia kriisi poolõ. Esieränis kõvastõ tulõva hengehädä vällä, ku perekunda sünnüs lats.
Paariläbikäümisen om tihtsäle nii, et sarnanõ tõmbas sarnast, tuuperäst saava hätiga inemise umavaihõl kokko.
A kuimuudu sis toimõ tulla ja tõõnõtõist tukõ? Ku mõlõmba tiidvä ummi häti ja omma valmis vastutusõ võtma, sis om seo tiikund lihsämb. Loomuligult ei saa olla kimmäs, et kõik kõrda saa. Tihtsäle saa takistusõs tuu, et tulõ sügäväst valust läbi minnä ja tuujaos ei olõ egäüts valmis. Ku mõlõmba omma valmis hindä sisse kaema, sis edimäne asi om kirja panda uma haava, kõik, miä hindäl teedä omma.
Sis olnu hää partnõriga maaha istu, et mõlõmba saasi ummist asjost kõnõlda. Ja kõnõlda ka tuud, midä kiäki uma valuga tegemä nakkas. Edesi võis kirja panda, midä om vaia, et uma valuga parõmbalõ toimõ tulla.
Mi ei saa tõistpuult panda uma õnnõ iist vastutama. Meil om võimalus ummist tahtmiisist ja mõttist kõnõlda ja tõõnõpuul saa anda tuud, midä meile vaia, määndsegi piirini ja sis, ku tuu timäle passis. Mi ei või jäiä tuust sõltuvas ja panda timä olgõ pääle suurt kuurmat. Saami alosta tüüd esihindä haavu ravitsõmisõga.
Ku paariläbikäümine om väega mürgüne ja om pall’o füüsilist vai vaimsõt vägivalda, tulõ tõsitsõlõ ja kimmäle tiidvüstä, et säänest asja ei saa umas võtta. Tihtsäle tulõ läbikäümine lõpõta, et saanu alosta tervessaamist.
Täämbädsen kipõn ja stressi täüs ilman om kimmäle hää löüdä hindäle terapeut, kiä tuu protsessi man tukõ saa anda.
Lumiste Kati
Kiränik Lumiste Kati and värskit mõttit, kuimuudu egäpääväello vaeldust löüdä ja märgotas tuust, miä parasjago süäme pääl.
