Seo puulpäävä peetäs Rõugõn Ööbikuoron kogokunnafestivali ja Uma Meki laata. Päävä päämine mõtõ om anda teedüst tuu kotsilõ, kost tulõ mi süük.
Õigõlõ peetäs kogokunnafestivali katõl pääväl. Riidi, 8. süküskuu pääväl omma päämidse tegemise Rõugõ valla koolõn-latsiaidun ja mõtõldu latsilõ. Näile tetäs tüütarri ja kutsutas üles aiakraami nunnunäütüsele tuuma.
A suurõmbalõ rahvalõ mõtõldul söögifestivalil 9. süküskuu pääväl võetas arotusõ ala paikligu ja mahhesöögi. Ööbikuoron om tuu päiv viis esisugumast alla laada, tüütarri ja kultuuriprogrammiga. «Kogokunnafestival om terve seo kandi rahva jaos kokkosaamisõ kotus, kon mi kõnõlami paigapäälitsest söögist. A meile tulõva ka tiidläse, kes kõnõlasõ mitmõsugutsist asjust. Juttu tulõ ilmast, mullast ja kompostist ja tuust, midä mahhesüük õigõlõ tähendäs,» seletäs festivali iistvõtja Kesküla Kaja.
Päält loengidõ saa festivalil üten lüvvä tüütarrin. Juhendaja näütäse tuud, midä mõistva. Om ka kultuuriprogramm ja laada päält saa paigapäälist ja Uma Meki märgiga süüki osta. «Laadal om nii mahhesüüki ku muud paigapäälist ja omma ka söögikõrraldaja. Ummamuudu om tuu, et meil ei olõ ütekõrdsit anomit, a omma peris anoma,» kõnõlõs Kesküla Kaja. «Et Rõugõ vallan oll’ Võro maakunna edimäne kuul, kon naati koolilatsilõ mahhet süüki pakma, sis om tuu kah märgiline, et mi tan teemi suurõmba rahvapido, kon mi seletämi, mis aol mi elämi ja mis olõs tähtsä teedä tuu kotsilõ, kost mi egäpääväne süük tulõ. Küsümi tuud, et ku inemise inämb esi süüki ei kasvata, kas sis piässi tiidmä, midä poodist otsi.»
A mille om tähtsä teedä tuud, kost mi egäpäävä süük tulõ? «Ku üteldäs, et sa olõt tuu, mis sa süüt, sis olõs hää teedä, midä sa suuhtõ panõt. Iks olõs hää tuu pääle mõtõlda, selle et tervüs om inemisel kõgõ tähtsämb asi ja tervüs tulõgi tuust, midä süvväs. Ku tahat, et sul olõssi hää elu, piät kaema, midä suuhtõ panõt,» löüd Kesküla Kaja.
Festivalil om hulga kõrraldajit: pääkõrraldaja om Rõugõ vald, tugõva Võromaa arõnduskeskus ja Võromaa partnerluskogo ja taa om osa «Tarto 2024» Lõuna-Eesti kogokunnaprogrammist. Päävä loenguosa kõrraldõdas üten Tarto Ülikooli eetigakeskusõ projekti «Tartu maailmaülikool» vidäjidega, tüütarri iistvõtja om MTÜ Kagu-Eesti Loodusrahvas. Kultuuriprogrammi kõrraldas Rõugõ valla rahvamaja ja laatu võtva iist Uma Meki vidäjä.
Ligemb teedüs: rouge.kovtp.ee/kogukonnafestival.
Rahmani Jan
Kogokunnafestivali iistvõtja Kesküla Kaja. Rahmani Jani pilt
