Puulpäävä, 16. süküskuul and’ suvõl võro keele iistkõnõlõja ammõtit pidänü Saarõ Hipp (pildi pääl kural) Krabi kõrtsi iin ammõdi üle vahtsõlõ iistkõnõlõjalõ Mürgü Marjele.

Krabi külätiatri vidäjä Mürgü Marje om kirotanu hulga võrokeelitsit näütemänge ja noid ka püüne pääle säädnü. Seo suvõ alostusõn tull’ tä vällä uma pistüjalapulliga «#paganamaamann», miä kõnõlõs keelest ja võlssi arvosaamisõst. Marje om ka tunnõt seenekorjaja ja -tundja, kiä saa mõtsast söögisiini egäl aastaaol.

Umal ammõdiaol lupa Mürgü Marje jäiä esihindäs. Tuu tähendäs, et tä käü seenen ja pand noid purki (plaanin om seo süküs sisse tetä 300 purki) ja tege ummi muid toimõnduisi innekõkkõ kodokandin. Tuu man kõnõlõs tä kõgõ umakandi kiilt, nigu tä iks om tennü.

Võro keele iistkõnõlõja om võrokõnõ või võrokõisi sõbõr, kiä mõist võro kiilt ja om iinkujos avaligun võro keele pruukmisõn. Iistkõnõlõja ammõditunnismärgi omma ilmatugi (sau), kõnnõtoro (ruupor) ja kaalaraha.

Võro keele iistkõnõlõja tegemiisil saa silmä pääl hoita Näoraamadu (Facebook) lehe pääl «Võro keele iistkõnõlõja».

UL

Saarõ Hipp ja Mürgü Marje Krabi kõrtsi iin. Rahmani Jani pilt