Minevä tõsõpäävä peeti Kanepi seldsimajan Hirvlaanõ Milvi vahtsõ raamadu «Jõksi raamat» näütämispito.
Raamatust saa lukõ Jõksi külä ja naabrikülli Kelläkülä, Heisri, Mõndsi, Naha, Piigandi, Karstõ ja Kaagri (Kaagvere) talodõ ja inemiisi inneskidse ao tähtsämbide tegemiisi kotsilõ.
Raamatun tuvvas arhiiviriioli päält rahva kätte vana koolimehe Tina Augusti käsikirälidse uurmisõ Jõksi külä majandus- ja ütiskundligust elost ja läbikäümiisist 19. aastasaa tõõsõl poolõl, neide man om hulga joonistuisi. Lukõ saa satu uma ao aktiivsidõ Kanepi kandi inemiisi ja paikkunnan olnuidõ kuulõ kotsilõ. Är om trükitü hulga pilte.
Pia 300lehekülelidse «Jõksi raamadu» and’ vällä MTÜ Kanepi Laulu Selts ja huvilidsõ saava tuud kaia ja osta Kanepi seldsimajast.
UL
Hirvlaanõ Milvi vahtsõ raamadu näütämisel 12. süküskuul Kanepi seldsimajan. Rahmani Jani pilt
