Kas su hengen helises muusiga? 1. rehekuul oll’ riikevaihõlinõ muusigapäiv, a mu meelest võinu terve rehekuu olla muusigakuu. Kõrrast lätt jo külmembäs ja pümmembäs, jõuluni om viil parasjago aigu ja kuigi tulõ seo vilu aoga toimõ tulla.

Ma soovita õdagidõ kündlevalgusõ käen ütenkuun istu, laulda, pilli mängi. Õkva nii, nigu oll’ mu vahtsõn koton soolaleeväpidol.

Muusiga täüt mi henge ja miili, tuuperäst es pidänü mi häbendämä uulidsa pääl ümisemist, hää kõlaga vüürüisin laulmist. Latsiga võinu laulda ja tandsi egä päiv, tuu võinu olla kuunkäümiisi loomulik osa.

Ku olõt är armunu, sis tüküt esihindäst kõik aig laulma. Selle et heng helises seen. A ku sääne sais sul parasjago külän ei olõ ja kaamos tassakõistõ võimust võtt, sis tii hindäle mõnno lämmä vanniga, hää hõnguga tsäiga, hindä hellämisega. Ja sõbra, nimä võinu olla sügüse iks kimmä seldsilise. Sõpruga võis kävvü kontsõrtõl ja ku noid näütüses Võrol parajat hulka ei olõ, kõrralda esi kontsõrt: kutsu muusikist tutva küllä ja luu hindäle esi muusigasaarõkõnõ.

Mu unistuisin võinu egän ammõdiasotusõn, esieränis koolõn olla muusigatarõ. Sääl pidänü saama kesk rohiliidsi kasvõ mõnusalõ diivani pääl lösüten hääd muusikat kullõlda. Säänest asja olnu vaia ka suuri kuulõ oppajilõ. Parhilla, ku olõ esi üte suurõ kooli oppaja, tunnõ päält pikkä päivä esieränis puudust ütest tasomistoolist muusikaga.

Alosta jäl Võrol kolmapäivilde improtiatri tüütarri, kon tarvitami hulga umma hellü, liikmist ja luuvust. Loomulikult tahasi suurõmba hulgaga kõrralda säändsit lauluõdakit kah, kon lastas egäpäävärutiinist vallalõ ja liigutas uma helüga kuunkõlan heliseväle meditatsiooni. Ku seo sinno huvitas ja tahtnu hinnäst impron vai laulmisõn proovilõ panda, kiroda mullõ. Naar ja muusiga andva meile kõgõ loomulikumbal moodul tervüst.

Kõigilõ väikuilõ liinulõ soovi pall’o muusikat. Ka suurõmbilõ liinulõ, kon suurõ saali ja suurõmba võimalusõ. Inemise heng võinu helläste helistä ka noilõ vasta, kiä minkagipoolõst tõistmuudu.

Sis jääse kõik mõttõ vakka.

Kost muidu saanu inemise henge taa… muusiga!

Lumiste Kati

Kiränik Lumiste Kati and värskit mõttit, kuimuudu egäpääväello vaeldust löüdä ja märgotas tuust, miä parasjago süäme pääl.