Lindora laadu pääl 28. rehekuul näüdätäs tulõva aastaga Võro-Seto tähtraamatut.
Vahtsõst tähtraamatust lövvämi pikembä intervjuu tiatrimehe ja kunstnigu Piirimehe Mardiga ja kirändüsmehe Sepajõe Richardiga.
Muusiganukan kullõsõ Kuslapuu Kaisa ja Lehtsalu Markus tõõnõtõõsõ muusikat. Saarõ Hipp kirotas tsipa Räppo Jaani autobiograafiast ja arotas, minkast noorõ uman keelen kõnõlõsõ.
Contra kirätüküst saami teedä, miä om mägijalgpall. Jalgpallijuttu aja ka Vaaba Janek. Raudmetsa Carmen and ülekaehusõ seto nuuri laagrist, Saarõ Evari jutust saami inämb teedä Mamastõ kandi paiganimmist ja Ilvesse Aapo näütäs umma näütemängu Sibula Jaanist ehk Ivan Narodnyst.
Kauksi Ülle and ülekaehusõ võrokõisi kongressist ja Roosi Reijo luulõtas kõrraga mitmõn õdagumeresoomõ keelen.
Raamatun om jago simunapääväst simunapääväni, kon kirän aastaga joosul olnu umameelidse ja -keelidse tegemise. Raamadu lõpuotsan om tulõva aastaga kallendri.
2024. aastaga Võro-Seto tähtraamadu om kokko säädnü Vaaba Janek, kunstnigutüü om tennü Seto juuriga uulidsakunstnik Hapnik.
UL
