Kiränik Uibopuu Valevil om täämbä 110. sünnüaastagapäiv. Tä sündü Võrumaal Vana-Antsla vallan Õru mõtsavahi puul, a timä priinimi om väega selgele Sangastõ kihlkunna uma.
Nimel Uibopuu om täämbädsen Eestin 263 kandjat. Viil omma olõman nimekuju Uibopu ja Uibubuu, kummalgi kandjit veidemb ku kuus.
Laatre mõisan panti seo nimi (hingelugõmisõn Uibepu) Ulbi Kotre perrele. Kotre oll’ Uibopuu Valevile vanaesä vanaesä. Kuna Ulbi talu om Õru külän, sõs või olla esiki nii, et Õru mõsavahikotus om saanu nime Valevi vanaesä Juhani perrä, kiä Laatrest Vana-Antsla valda elämä tull’.
Uibopu panti Pringi mõisan Toodsimäe Jaani perrele. Viimäst nimetäse Sangastõ personaalraamadu Pürstä Jaanis ja kirutasõ priinimme Uibupu ~Uipupu.
Sangastõ personaalraamatist, alustõdu 1821. aastagal, om nätä, et opõtaja Nelkerdt om viil mitman mõisan pandnu vai tahtnu panda nimme kujul Uibopu, Uibupu, Uipupu. Mõnikõrd om puu-lõpp säänest tüüpi nimest ildamb ka maha tõmmat. Mõisa, kon seod nimme varajadsõst personaalraamatust viil löüdä või, omma Kuigatsi, Vaalumõisa Küläaseme talu (hingelugõmisõn Uibo), Keeni mõisa ja Lotamõisa (hingelugõmisõn Uibo). Tuu perioodi personaalraamatun om muidki esimuudu puu-lõpulidsi nimmi, näütüses Pringi mõisa Kuusigu talu Ott Pappelpu, hingelugõmisõn hoobis Lipping.
Uibopuu om topõlt puu-sõnaga nimi, selle et sõna uibu esi sisaldas joba sõnna puu: ui+puu. Või olla, et ui- om kulunu sõnast ubina, a peris kimmäs tuun kah olla saa ei.
19. aastagasaa Lõuna-Eestin sai nimmin võidulõ kuju Uibo. Tartu kiräkeelen lihtsalõ panti egäle poolõ sõna lõppu -o. Parla om nimel Uibo 952 kandjat, nimel Uibu – 152.
Nimme Uibopuu om võet ka 1921. aastal Setomaal, ütel kõrral Petseri vallan. Eestistämisel omma vahtsõ nime Uibopuu võtnu Hamann, Vabrasson ja Zupping.
Sarnanõ liitsõnalinõ nimi om Uibokand ~ Uibukant. Edimält oll’ tuu Vahtsõliina nimi algkujuga Uipukand, a 1921. aastal panti Setomaal ka nelläl kõrral Uibokand. Peris pikä nimekirä saa tetä õnnõ Setomaa uibo-nimmist: Uiboaid, Uiboaed, Uiboleht, Uibomaa, Uibomäe, Uibomägi, Uibonurm, Uibooss, Uibos, Uibotalu ja Uiboupin.
Saarõ Evar
Rubriigin kõnõldas perekunnanimmi periolõmisõst ja tähendüsest.
