Mõnikõrd tulõ armsas saanuist tegemiisist vallalõ laskõ. Ku tunnõt, et mõni asi sinno inämb elon edesi ei vii, tulõ lõpõtamisõotsus tetä. Mul um olnu niimuudu paari spordialaga.
Tuu oll’ uma 30–40 aastat tagasi, ku ma võti perämäst kõrda Tartu maratoni numbrõ kaalast ja mõtli, et inämb suusavõistlusõl üten ei tii. Ei olõki võistõlnu.
Seo aasta tei otsussõ, et ma ei lää inämb golfivõistluisilõ. Golf miildüs mullõ iks ja ku mõni sõbõr mängmä kuts, lää hää meelega ja kutsu esi kah sõpru üten, a inämb ei võistlõ.
Ärtundminõ tull’ Pärnun ütel võistlusõl. Olli har’otanu ja oll’ tunnõ, et pall lindas häste. A võistlusõ hummogu es olõ inämb hääd tunnõt seen. Mängun tull’ ette mitu vipõrust, miä veivä taipamisõ mano: nüüt um mul golfivõistluisiga kõik.
Perän tuud otsust ja mängu jaluti mõtsa vahel tiid pite golfimaja manu ja mõtli hindäette. Mõttõ lätsi säänest rata, et kuis niimuudu saa ütte asja perrä jättä: olõ nännü vaiva, tennü kõvastõ tüüd, kulutanu väega pall’o umma vapa aigu ja rahha tuu pääle, et palli lindama saia. A tõsõst külest, olõ joba 66aastanõ, miä tähendäs, et kihä ei mõista inämb niimuudu oppi nigu noorõn põlvõn. Ja mullõ tull’ miilde üte hää sõbra manitsus, et vanan iän saat tegeldä õnnõ tuu spordialaga, midä noorõst pääst olõt tennü. Noorõlt jääs egä liigutus, mis tiit, miilde ja tuu um meelen elo lõpuni. Niimuudu tiiät, miä või sullõ vika tetä ja tuud kah, kuis hinnäst kaitsa ja tohtõrda.
Nii otsustigi, et spordin proovi löüdä inämb aigu uma meelüsspordiala tsihiotsmisõ jaos. Andsõ nõunolõgi olla järgmädse kats aastakka kah orienteerumisliidu president.
Mullõ tege väega rõõmu, ku näe väiksit latsi, kiä tahtva tsihiotsmispunkti man piiksuta. Vai ka veteranõ MM, ku näe 95- vai 100aastaidsi mõtsan jalutaman. Tuu tege mullõ pall’o rohkõmb rõõmu ku mõtõ, et ma es saa golfipallilõ pihta, ja sõs olõ tuuperäst egä kõrd pääle võistlusmängu vihanõ.
Vahel tulõ sisseharinust vallalõ laskõ ja tetä tuu asõmõl periselt rõõmu pakvit asju. Noid, miä avitasõ esihinnäst ja ummi ligimäidsi, miä avitasõ olla rõõmsa tuu üle, et meile um elo antu ja mi saami seod ello ellä.
Pindmaa Aigar
Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.
