Ooda noh!
Täämbädsel aol om Vikerraadion egä neläpäiv saadõ «Vahtsõmbat Võromaalt» ja tõisil päivil omma saatõ tõisist paigust. A paigapäälitsit raadiosaatit om tettü varrampa kah.
Paikligõ raadiosaatidõ kuldaig oll’ 1970. aastil. Vanõmbist tegijist olli kuulsamba Kooli Ott ja Anniko Silver. Rahvalõ nuu saatõ ja poisi miildü. Mõnõ näist võtsõva kül kõvastõ viina, a nä kõnõli lihtsäle egäpäävätsest elust ja tüüst ja es pillu nii väega parteiloosungiid, midä inämbüsen tõisin raadiosaatin ette tull’.
Paigapäälitsit saatit tetti Võrol kah. Noidõ tegemise mano kogonõsi egäsugutsit entusiastõ ja rahvatiatri näütlejit.
Ütskõrd oll’ lehemiis Vaherma Heldur mikrofoni man ja kõnõl’ põllumajandusõ uudissit. Lugõmisõ aigu tull’ stuudiolõ tunnõt kiibitsejä Urbaniku Aivo, pandsõ Heldurilõ viinatopsi lavva pääle ja ütel’: «Võta!»
«Ooda noh!» kostsõ Heldur vasta. Et oll’ õkvasaadõ ja Heldur mikrofoni takan, läts’ tuu vastus muiduki eetrile.
