Katõtõistkümnele tähemärgile kuulutas laelambi abiga vahtsõs aastas tüü-, raha-, armastusõ- ja ilmaõnnõ Eesti kõgõ veidemb tunnõt tähetark Kaldman-Mennosõ Hedi (74).
Oinas 21.03.–20.04.
Tüü. Kõik puutri ja telefoni läävä kuutormõ peräst katski. Sa piät uma kontoritüü päält är tulõma ja nakkama kässiga tüüd tegema. Sust saa kokk. Vai lambakasvataja.
Raha. Rahha jakkus kolm kõrda Itaaliahe reismises, a Hollandihe inämb ei jõvva. Sõida vähämb Boldiga ja jõvvat egäle poolõ.
Armastus. Pallõ armsamb naasõs vai mehes, om aig.
Ilm. Kõik aig omma kuutormi. Saa-i maada ja arvuti ei tüütä.
Pull 21.04.–20.05.
Tüü. Sul om identiteedikriis. Tulõ tüült är ja opi midägi vahtsõt. Näütüses mehhatroonikus vai semiootikus.
Raha. Rahha olõ õi, mine lihtsähe mõtsa elämä, kül sääl midägi süvvä lövvüs.
Armastus. Olõt pulli täüs. Kutsu uma salaarmastus lõpus vällä, Pluto näütäs, et seokord lätt õnnõs.
Ilm. Kõik muu om halvastõ, a ilm om hää – päiv mugu paistus, õnnõ paar päivä om orkaani.
Katsiku 21.05.–21.06.
Tüü. Merkuur om retrograadin. Tuu tähendäs, et Katsikulõ passis inämb kats poolõ kotussõga tüüd ku üts täüskotus. Tõsõ tüüni juhatas sinno vana sõbõr, kedä kogõmada uulidsa pääl trehvät.
Raha. Automass süü raha är. Osta ruttu kastiratas, toolõ mastas pääle.
Armastus. Brigitte sinno eelmidsel aastagal es taha (pallõ võlss ettekuulutusõ peräst andis). A tuu oll’ õnnõ Hendriku süü, proovi sa vahtsõst.
Ilm. Lögä om teie pääl terve aasta. A tuu vasta avitas hää paar saapit.
Vähk 22.06.–22.07.
Tüü. Tahat pensionilõ minnä, a pensioniigä juusk kõik aig iist är. Piät nakkama trenni tegemä, sõs jõvvat perrä.
Raha. Majanduskriis, sitt lugu. Piät angõrjidõ ja vähke süümise maaha jätmä, a vast kuiki saat iks söönüs. Makaron om kah süük.
Armastus. Tunnõt hinnäst ütsikult? Seldsilidse lövvät õnnõ televiisorist – mine «Parim kaaslane» saatõhe.
Ilm. Vesipüksi kummitasõ sinno aknõ takan – olõ valmis!
Lõvi 23.07.–22.08.
Tüü. Sinno uut iin suur karjäär. Võta kopp ja kaiva kuulsus vällä.
Raha. Marsi kuusnukk lupa, et aastaga tõsõn otsan käänetäs rahakraani valla. Olõ valmis, pangan või ruum otsa saia.
Armastus. Sul om armastusõ otsmisõst kõrini. Märgotat vällä vahtsõ kohtinguäpi ja tiit tuuga kogo ilma õnnõlikus. Hindä kah.
Ilm. Satas maaväitsi – vihmavari ei avita.
Neitsü 23.08.–22.09.
Tüü. Kunstmudsu võtt su tüü är, näksi murro – lehmäkasvataminõ om su vahtsõnõ kirg.
Raha. Soomõn omma raha kinni. Pallõ Väinamöiselt andis, et tä tütre maaha leit, ja tä lask raha vallalõ.
Armastus. Kliima lämmämbäsminek – kuum suvi. Kuum suvi – kuum romanss.
Ilm. Ulli lämmi, +45 kraati, esiki ku tõisil om külm, sis sul om iks lämmi. Õnnõs om rõivilda käüjide jaos pall’o kotussit valla.
Kaalu 23.09.–23.10.
Tüü. Nõstukijuhtõl pidi hää palk olõma. Mõtlõ tuu pääle tõsitsõlõ!
Raha. Raha om rassõ, a nuu omma õnnõ raudraha. Kaalu om noil kõvastõ, a väärtüst veidemb, ku olla võinu.
Armastus. Abielo om nüüd võrdnõ. Kaalu, kumba tahat!
Ilm. Üleujotus tulõ 23. põimukuu ja 4. süküskuu vaihõl. Paadimassu õks viil ei olõ – mõnikõrd iks vidä kah!
Skorpion 24.10.–22.11.
Tüü. Mine supõrstaarisaatõhe, ku sa sääl viil käünü ei olõ. Sa ei võida, a miä tuust. Külä pääl om narri iks vaia.
Raha. Hää aastak krediitkaardivõla masmisõs. Beyoncé’i kontsõrdilõ ei saa inämb mõnda aigu minnä, piät kokko hoitma.
Armastus. Tinder läts’ katski. Otsi üts Lõvi üles, tuul om hää äriidee, miä sinno avitas.
Ilm. Silmävesi juusk, kooni tulõ jõgi. Hää lämmäga ujoman kävvü.
Vibumiis 23.11.–21.12.
Tüü. Tüüd om pall’o, a kuulsust om kah. Veenusõ spiraal lupa, et saat suurõst tüütegemisest kõva kõtuvalu. Mõtlõ perrä, kas tuu om iks periselt toda väärt.
Raha. Osta maid ja majjo kokko. Krüpto või jo põhja minnä, a tuu investeering püsüs.
Armastus. Armastusõn uut sinno iin üllätüs – ja seo ei tulõki muna seest.
Ilm. Kõik aig satas rusigusuuruidsi terriga räüssä – hoia kiivri ligi!
Kivikits 22.12.–20.01.
Tüü. Piät võtma pikembä puhkusõ, tüü om tervüse pääle nakanu. Sõida mõnda saarõriiki, inne ku nuu vulkaaniga õhku lindasõ. Näütüses Vormsilõ.
Raha. Seo raha om loodõtust rassõmb.
Armastus. Kõik su sõbra tahtva joba pikä lavva taadõ saia. Olku olla!
Ilm. Kõik aig om tsipakõsõ külm.
Viikaldaja 21.01.–19.02.
Tüü. Sul om timahava kats karjäärivõimalust – nakkat kas presidendis vai hoobis pensionäris.
Raha. Ka seo aastak plaanit osta vahtsõ paadi. Egäs juhus mõtlõ inne hoolõga perrä, kas om iks vaia.
Armastus. Vana armastus püsüs nigu iks. Mis tuul pensionäril iks armastusõga tetä om?!
Ilm. Hää kalailm, tuult olõ õi. A ku tä mõnikõrd iks puhkma trehväs, piä meelen, et hummogu puult puhkva tuul ei tuu hindäga üten midägi hääd. Sis massa-i kalalõ minnäki.
Kala 20.02.–20.03.
Tüü. Tüüseldsilidse umma jälle väsütäjä. Käänä näile määnegi käkk. Näütüses verikäkk. Vai kotlet.
Raha. Protesteerit, et riik andnu rohkõmb palka. Tuu pahanõs seo pääle är ja jäät tuust vähätsestki ilma.
Armastus. Pikä lavva taadõ ei saa, a vast õnnõstus hinnäst kuiki tsõõriku lavva viirde skeemitä.
Ilm. Är Padaorgu minku, tuiskat sinnä kinni. Muial om rannailm.
Reimanni Hildegardi tsehkendüse
