Tüüsaisak
Ma kuuli raadiost, et kuulmeistri nakkasõ streikmä. Kõik tähtsä inemise kõnõlõsõ, et oppaja võiva kotoh olla, a latsõ piät saama tüüsaisagu aigu kah koolimajah oppi. No ku kõik koristaja ja remondimehe kah tunni saata, sõs iks suurõh koolih egä klassi mano oppaja kotussõtäütjät ei jakku. Ja kas majahoitja mõist rehkendämist opada vai latsiga ümbre kävvü?
Pall’o kõnõldas tuust kah, et ku kuulmeistri streik, sõs tälle palka massa tohe-i. Periselt käü meil jo sügüsest saadik üts suurõmbat sorti streik. Osa riigikogo liikmit tegevä kah tüüsaisakut. Ei tüütä esi ja lasõ-i tõisil kah tüüd tetä. A näile mastas tuu iist palka edesi. Ja Eesti inemise ei tii tuust vällägi. A ku oppaja tahtva streiki, sõs nakkasõ kõik näpoga näütämä, et mille nä latsi pääle ei mõtlõ. A oppaja saa latsi õnnõ sõs häste opada, ku tä esi hinnäst häste tund.
