30. vahtsõaastakuul tulõ Navi seldsimajan Võro maakunna kuulõ kuuntüüpäiv, kon otsitas võimaluisi, kuis perimüsoppusõlõ inämb vunki mano anda.
Mõtõ sääne päiv kõrralda tekkü ütel seltskunnal sügüse luumõtalossõl «Vunki mano!», päämidses takasttoukajas huul võrokõisi ja setodõ kultuuri alalõjäämise peräst. «Võro maakunnan om kats kimmäst kultuuriruumi. Tahas, et nii ka jääs, a tõtõ om, et nuuri tiidmise umast kultuurist omma kehväkese. Tuuperäst tulõ perimüst ja hindätiidmist inämb kuulõ opikavva klapita,» ütel’ kuuntüüpäävä iistvõtja Valgu Meel Võromaa arõnduskeskusõst. Parhilla om perimüsoppus kukkivõrd õnnõ üte kolmandigu Võro maakunna kuulõ opikavan, a võissi, esiki piässi olõma kõigin koolõn.
Valgu Meele sõnnu perrä omgi kuuntüüpäävä üts tsiht koolõlõ perimüsoppusõ kõrraldamisõs julgust mano anda. Parhilla om seo jaos paras aig, selle et iin sais opikavvu vahtsõstegemine. Ütenkuun loodõtas muu hulgan vällä märki, kuis perimüsoppust koolõn kõrralda. Kuuntüüpääväl näütäse Võro ja Seto instituut ka opimatõrjaalõ. «Meil om hüvvi opimatõrjaalõ,» kinnüt’ Valgu Meel. Vaia om õnnõ, et kooli kah neo üles lövväs.
Võro- ja Setomaa kuulõ esindäjä saava kuuntüüpääväl tutvusta ja vaihta ka ummi häid kogõmuisi umakultuuri oppamisõst. Päävä külälise – filmimeistre Hintsi Anna, keelemiis Pargi Indrek ja saarlanõ Kanemägi Kadri – toova vaimopuhahust välästpuult. Hintsi Anna kõnõlõs, määndse parõmbusõ and kimmäs hindätiidmine lajan ilman. Paigaga köüdetüt hindatiidmist seletäs uma mättä otsast valla ka Pargi Indrek. Kanemägi Kadri tulõ Võromaalõ kogõmuisiga, mille om tälle andnu saarlusõ kursusõ kõrraldaminõ Saarõmaa gümnaasiumin. Hüvvi mõttit Võromaa- ja Setomaa-näoliidsi kuulõ kujondamisõs avitasõ otsi ka noorõ esi.
Kabuna Kaile
