Minevä riidi tunnustõdi Rogosi mõisan Võro maakunna kultuuritüütäjit. Kokko anti vällä 30 kultuuri valdkunna preemiät. Kõgõ suurõmba preemiä and’ Kultuurkapitali Võromaa ekspertgrupp.

Kultuurkapitali kats kõgõ tähtsämbät avvohinda saiva kultuurikõrraldaja Valsi Kristi, kiä kuulutõdi 2023. aastaga Võromaa kultuuripärlis, ja rahvakultuuri ja rahvatandsu hoitja Pau Maie, kedä tunnustõdi elotüüpreemiäga. Lisas oll’ Kultuurkapital vällä pandnu väikumba preemiä. Uma avvohinna anni vällä ka rahvakultuuri keskus ja Võro instituut.

Võromaa Kultuuripärli tiitli saanu Valsi Kristi tõi uman tenokõnnõn vällä kats mõtõt, miä käävä timä meelest täämbädsel pääväl kõgõ inämb mikandi kultuurielo kotsilõ. Kõgõpäält tuu, et tan mõistõtas umavaihõl kuuntüüd tetä, miä ei olõ Eesti kultuuripilti kaiõn harilik asi. Lisas löüdse Valsi Kristi, et inemise omma päält koroonaao kotonistmist naanu jäl kultuuriüritüisil käümä.

Kultuurirahvas sai pidol kullõlda kirämehe Mikita Valduri nal’aliidsi tähelepanõkit tuust, määndse omma nuu Eestile umadsõ as’a, midä muialpuul ei olõ. Üts näüde oll’ eestläisi seenekotussõ, miä omma kõigil olõman ja midä hoitas tõisi iist hoolõga salahusõn.

Kultuurirahva pidol astõ laulõga üles lauluoppaja ja koorijuht Kattai Kaari. Elevüst teküt’ rahva siän ka lustilidsõ vaskpilliansambli Brassical ülesastminõ. Õdagut juhtsõ nuur Võromaalt peri näütlejä Käose Karel.

Rahmani Jan

Kultuurkapitali Võromaa ekspertgrupi aastapreemjide saaja. Männe Tiina pilt